Ostiraletik igandera 140 koronabirus kasu atzeman dituzte Donostian
Intzidentzia metatuak gora egin du beste behin, eta joan den astean ikusitakoa gero eta ageriagoa da: tendentzian aldaketa bat izan da; 2020 urte amaieran izandako beheranzko joeraren ondoren, 2021a goranzko joerarekin hasi du.
(Argazkia: Beñat Parra) 
Eusko Jaurlaritzak ostiraletik igandera zenbatutako koronabirus kasu kopurua iragarri du. Ostiralean, 43 kasu atzeman zituzten, larunbatean 49 eta atzo, igandean, 48. Beraz, guztira, 140 koronabirus kasu zenbatu dituzte. Intzidentzia metatuak gora egin du: une honetan, 265,91koa da eta ostegunean, 216,37koa zen. Nabarmentzekoa da 2020ko azken astera arte, zifra horrek beheranzko joera zuela, eta joan den astean, 2021eko lehenengoan, goranzko joera txikia ikusi zela lehen aldiz hainbat astetan. Gaurko zenbakia begiratuta, joera aldaketa hori gero eta ageriagoa dela ikus daiteke.
Intzidentzia metatuak proportzio bat neurtzen du; alegia, zenbat pertsona gaixotu diren azkeneko hamalau egunetan zati zenbat pertsona osasuntsu zeuden periodo horren hasieran; ondorioz, birusaren kutsatzen abiadura erakusten du. Jaurlaritzaren irizpideen arabera, zifra hori 500dik gorakoa denean, leku hori gune gorria dela esan nahi du, alegia, kutsatze maila altua dela leku horretan. Horrekin batera, intzidentzia metatuaren arrazoiak duela 14 eguneko intzidentzia metatua eta egungoa alderatzen ditu. Zifra hori 1 baino gehiagokoa den kasuetan, intzidentziak gora egin duela esan nahi du. Kasu honetan, zifra hori 1,19koa da. Beraz, duela 14 egunekoarekin errepartuta, goranzko joera hori gero eta nabarmenagoa da.
Kutsatze intzidentzia osasun eremuka
Intzidentzia metatuak gora egin du osasun eremu guztietan, Parte Zaharrean izan ezik. Jarraian bakoitzeko intzidentzia metatua ikus daiteke:
- Egia: 357,53
- Amara Berri: 316,10
- Parte Zaharra: 281,95
- Intxaurrondo: 271,38
- Loiola: 259,42
- Ondarreta: 218,93
- Amara-Erdialdea: 206,04
- Gros: 202,03
- Altza-Roteta: 173,2
- Bidebieta: 124,98
Kasu positibo kopuruari erreparatuz, jarraian ikus daitezke atzoko zifrak:
- Amara Berri: 16
- Gros: 11
- Altza-Roteta: 6
- Ondarreta: 5
- Amara-Erdialdea: 2
- Egia: 2
- Loiola: 2
- Bidebieta: 1
- Intxaurrondo: 1
- Parte Zaharra: 0
