Arrazoia eman diete Donostiako hondartzetako sorosle kaleratuei
(Argazkia: ELA) 
ELA sindikatuak jakinarazi duenez, Donostiako hondartzetako sorosleei finkotasuna aitortu zaie epai bidez, eta BPXport enpresa zigortu dute. Pasa den hondartzetako denboraldian kaleratutako lau sorosleei kalteak ordaindu edo berriz onartu beharko dituzte. Era berean, lehen aldiz, Kirol Instalazioen eta Gimnasioen Estatuko Hitzarmena onartu da hondartzetako sorospen zerbitzuko hitzarmen aplikagarri gisa. Honen bidez, langileei subrogatuak izateko eskubidea aitortzen zaie.
Duela hiru urte sorosleak grebak egiten hasi ziren lan baldintzak hobetzeko eta subrogazioa bermatzeko. Iazko udan mobilizazioetan parte hartu zuten lau sorosle kaleratu zituen BPXport enpresak. Hori salatzeko, sorosleek protesta kanpaldi bat jarri zuten Zurriolako hondartzan. IRUTXULOKO HITZAk kaleratutako bi soroslerekin hitz egin zuen. Gertaturikoa salatzeko, ELAk hainbat mobilizazio egin zituen, eta gatazka konpontzeko bide juridikoa abiatu zuen.
Sorosle kaleratuek hainbat denboraldi zeramatzaten lanean –10 urtera bitarte– aldi baterako kontratuekin, enpresak euren kontratuen finkotasuna onartu gabe. Horrekin batera, ELAk Donostiako Udalaren jarrera kritikatu du: “Oraindik ez dute bete duela bi urte baino gehiago hartutako konpromisoa: zerbitzu horretako langileen subrogazioa baldintza agirietan sartzea. Finkotasuna aitortu gabe eta subrogazio eskubiderik gabe, sorosleek lanpostua galtzeko arriskua dute denboraldi bakoitzean, Donostiako hondartzetako sorospen zerbitzuak zerbitzuko beteranoak galtzeko arriskua duen bezalaxe, horiek izanik zerbitzuaren funtzionamendu egokirako bermerik handiena enpresa esleipendunetik harago”.
Epaiekin bat eginez, azken hiru denboraldietan aldarrikatutakoa berretsi du ELAk. “Donostiako Udalari eskatzen diogu datorren hondartza denboraldia hasi baino lehen, baldintza agirietan sar dezala hondartzetako sorospen zerbitzuko langileen subrogazioa. Gure ustez, sorosleek euren lanpostuei eusteko duten eskubidea ziurtatu eta, bide batez, zerbitzuaren funtzionamendu egokia bermatzeko modu bakarra baita”.
