COVID-19aren aurkako txertoaren eraginkortasuna neurtzeko, boluntarioak behar ditu Biodonostiak
Zahar etxeetan txertaketari ekin diote. (Argazkia: Matia Fundazioa) Alemaniako CureVac enpresak sortutako COVID-19aren aurkako txertoaren eraginkortasuna eta segurtasuna egiaztatuko duen saiakuntza klinikoan parte hartuko du Biodonostia Osasun Ikerketako Institutuak. Mundu osoan 30.000 pertsonak baino gehiagok hartuko dute parte saiakuntza klinikoan, eta Gipuzkoa, Bizkaia eta Arabako 2.000 pertsona inguruk parte hartu ahalko dute. Ostiralean ekingo dio Biodonostiak boluntarioak biltzeari.
18 urte baino gehiago izan behar dute saiakuntza klinikoko partaideek, eta boluntarioak ausaz banatuko dituzte: partaide batzuek txertoa jasoko dute, eta beste batzuek plazeboa. Txertoaren bi dosi jarriko dituzte, 28 eguneko tartearekin. Biodonostiak azaldu duenez, emaitzen arabera, “txertoaren erabilera onartzeko prozesua azkartu daiteke”.
CureVac enpresaren txertoak Pfizer eta Moderna enpresen txertoek duten mekanismo bera dauka, hau da, immunitate-sistema estimulatzen duen RNA mezulariaren mekanismoa du oinarri. Hala ere, gainerako txertoengandik bereizten duena logistika da: “CureVacen txertoak jada merkaturatutako txertoak erabiltzeko topatzen dituzten oztopoetako bat gainditzen du. Izan ere, CureVacen txertoa mantentzeko eta prestatzeko baldintzek bere banaketarako logistika errazten dute”, azaldu du Biodonostiak.
