Txuri Urdinek bigarren postua berreskuratu du
(Argazkia: Ander Arraras) 
Partida berdindua izan bazen ere, azkenean Txuri Urdineko gizonezkoen taldeak 5-4 irabazi zuen Puigcerdaren kontra. Golak Mikel Mendizabalek (2), Pablo Alberdik, Patrick Fuentesek eta Juan Muñozek egin zituzten. Garaipenari esker, bigarren postua berreskuratzeaz gain, Ligako kanporaketetarako postu bat lortu dute. Izan ere, Jacak Bartzelonaren kontra galdu zuen, eta Txuri Urdinek dagoeneko bederatzi puntu ateratzen dizkio.
Eskubaloian, Bera Berak beste garaipen bat lortu zuen, oraingoan, Lanzarote Ciudad de Arreciferen kontra. Lehenengo zatian, batik bat, defentsan, hainbat akats izan zituzten donostiarrek. Aldiz, bigarren zati bikaina egin zuen Imanol Alvarezen taldeak. Partida hau zortzigarren jardunaldikoa zen; alegia, duela bi aste jokatu behar zuten, baina atzemandako koronabirus kasuak zirela eta, partida atzeratu behar izan zuten. Datorren asteko partida ere ezingo du jokatu Bera Berak. Izan ere, aurkariak bi koronabirus kasu atzeman ditu.
Saskibaloian, Ibaeta Basketek ezin izan zion liderrari irabazi. Azu Muguruzaren taldeak aurrez aurreko partida jokatu zuen Perfumerias avenidaren kontra, baita luzapenera iritsi ere. Azkenean, porrota eraman zuten etxera, baina partida ona egin ostean. Gipuzkoa Basketen eta Estudiantesen partidari dagokionez, atzeratu behar izan zuten, aurkariak atzemandako koronabirus kasuengatik.
Futbolean, Realeko mutilek puntu bat eskuratu zuten Vila-realen kontra, luzapenean. Etxekoek azkar egin zuten gola, baina txuri-urdinak partidari buelta ematen saiatu ziren, nahiz eta ez lortu. Bigarren zatiko lehen minutuetan aukera gutxi izan zituen Imanol Alguacilen taldeak. Azkenean, luzapenean, Isakek partida berdindu zuen. Emakumezkoek, berriz, Realaren eta Sporting Huelvaren partida bertan behera utzi zuten, Andaluziako taldean koronabitus kasuak zenbatu ostean.
ESKUBALOIA
Emakumezkoen ohorezko maila, 8. jardunaldia
Bera Bera 32 – Lanzarote Ciudad de Arrecife 20
SASKIBALOIA
Emakumezkoen lehen maila, 23. jardunaldia
Perfumerias Avenida 80 – Ibaeta Basket 76
ACB liga, 22. jardunaldia
Gipuzkoa Basket – Estudiantes (Bertan behera)
IZOTZ HOCKEYA
Gizonezkoen lehen maila, 14. jardunaldia
Txuri Urdin 5 – CD Puigcerda 4
FUTBOLA
Gizonezkoen lehen maila, 21. jardunaldia
Vila-real 1 – Reala 1
Emakumezkoen lehen maila, 18. jardunaldia
Reala – Sporting Huelva (Bertan behera)
