Itoiz taldearen argazkirik, bideorik, edota grabaziorik duzue?
Itoiz taldea. (Argazkia: Doxa Producciones) Doxa Producciones ekoiztetxea Itoiz musika taldeari buruzko filma prestatzen ari da, eta material bila dabiltza. Taldearen argazki, bideo, soinu grabazio edota artikulurik duen edonork archivo@doxaproducciones.com helbidera bidaltzeko eskatu dute.
Itoiz musika taldea 1976an sortu zuten, eta 1988ra arte aritu ziren musika jotzen. “Gure informazioen arabera, badakigu taldeak Donostian jo zuela, hain zuzen Anoetako polikiroldegian, baina ez dakigu zehatz zein urtetan. Gainera, Itoiz izenarekin ezagunak egin baino lehen, Indar Trabes izenarekin ibili ziren jotzen eta baliteke sasoi hartako materiala horrela oroitu edo gorde izana”, azaldu dute ekoiztetxekoek.
Asier eta biok (2014) filma ekoitzi du, besteak beste, Doxa Producciones ekoiztetxeak. Itoiz taldeari buruzko filmak dokumentala eta fikzioa uztartuko ditu.
