Ibaeta Basketek kopan aurrera egitea du helburu
(Argazkia: Ibaeta Basket) 
Valentzian jokatuko da emakumezkoen saskibaloi kopa, eta etxeko taldearen aurka jokatuko du gaur Ibaeta Basketek. Kopan ondo moldatu izan da Azu Muguruzak gidatzen duen taldea, baina aurrez aurre Valentzia izateak ez ditu gauzak erraztuko. Bestalde, Gipuzkoa Basketek neurketa garrantzitsua jokatuko du bihar Fuenlabradaren pistan. Arerio zuzena da jaitsiera postuetatik ihes egiteko, eta irabazteak baino ez die balio.
Izotz hockeyan ere asteburu polita dute aurretik Txuri Urdineko bi taldeek. Ligako play-offetako finalerdiak abiatuko dituzte Donostiako Izotz jauregian. Arerio bera izango dute, Puigcerda. Emakumezkoen taldeak bi neurketa jokatuko ditu, bihar eta etzi. Gizonezkoek, aldiz, bakarra bihar. Etxeko partida guztiak irabazita aurrerapauso handia emango lukete bi taldeek. Belar hockeyan, Realak Junior taldearen kontrako jokatuko du igandean. Sentsazio onen bidetik jarraitzeko asmoa dute.
Eskubaloiari dagokionez, Bera Berak Valladoliden jokatuko du hango taldearen aurka. A multzoko sailkapen nagusian bigarren postuan dago talde donostiarra, baina liderrak bi partida gehiago jokatuko ditu. Aurrez aurre izango duten taldea da sailkapeneko hirugarrena.
Futbolean, Realeko bi taldeek igandean jokatuko dute, eta biek etxean. Zubietako neurketa goizean izango dute neskek, eta Deportivo izango dute parean. Sailkapenean gora begira jartzeko neurketa izango da txuri-urdinentzat. Aldiz, Anoetan Levante hartuko du mutilen taldeak. Kopako finalerdietan galdu ostean, nekatuta iritsiko dira Donostiara.
SASKIBALOIA
Emakumezkoen Kopa, final-laurdenak
Valentzia – Ibaeta Basket (Ostirala, 20:30)
ACB liga, 25. jardunaldia
Fuenlabrada – Gipuzkoa Basket (Larunbata, 20:45)
IZOTZ HOCKEYA
Emakumezkoen ligako play-offen finalerdiak
Txuri Urdin – Puigcerda (Larunbata, 12:30 eta igandea 14:30)
Gizonezkoen ligako play-offen finalerdiak
Txuri Urdin – Puigcerda (Larunbata, 15:30)
BELAR HOCKEYA
Emakumezkoen ohorezko maila, 15. jardunaldia
Reala – Junior (Igandea, 11:00)
ESKUBALOIA
Emakumezkoen ohorezko maila, 14. jardunaldia
Valladolid – Bera Bera (Larunbata, 19:00)
FUTBOLA
Emakumezkoen lehen maila, 21. jardunaldia
Reala – Deportivo (Igandea, 11:00)
Gizonezkoen lehen maila, 26. jardunaldia
Reala – Levante (Igandea, 18:30)
