Parte Zaharra eta itsasoa
Aste Santuan Parte Zaharrak itsasoarekin duen harremana hobeto ezagutzeko ibilbidea aurkezten dizuegu.
(Argazkia: Estitxu Zabala) 
Urgulleko kanoiak
Damen bateria hirian beste garai batean bizitakoak imajinatzeko gune aproposa da. XVI. mendean eraiki zuten, eta hango kanoiek hainbat gudatan babestu zuten Donostia. Gaur egun ikusgai daudenek hori irudikatzen dute. Hala ere, gaur egungoek –1897ko Saint Chamond kanoiak– ez zuten inoiz hiriko gudetan parte hartu, apaingarri gisa jarri
baitzituzten 1963an.
Itsas Museoa
Kaitik ibiltzen zarenean, segur aski, Donostiak historian itsasoarekin izan duen harremanari buruz gehiago jakiteko gogoa sortuko zaizu, eta horretarako, geldialdi paregabea da Itsas Museoa. Hiriko itsas historia ondo baino hobeto aukera izango duzu museoan, eta horretaz gain, bi erakusketa interesgarri ikusi ahal izango dituzu: Leopoldina Rosa: gaur egungo istorio bat eta Leo eta Dinarekin odisea (haurrentzat).
Aita Mari
Kaia arrantzalez eta arrain saltzailez beteta egoten zen garaian, ospe handia eskuratu zuen Jose Maria Zubia Zigaran Aita Mari (Zumaia, 1809-Donostia, 1866) marinelak, itsasoan egin erreskateengatik. Halako batean zendu zen, olatu batek arrastatuta. Haren heriotzak asko atsekabetu zituen donostiarrak, eta kaian dagoen oroigarria eraiki zuten.
Nautikoa
Donostian bada lehorretik inoiz mugitu ez den itsasontzi bat: Nautikoa. Donostiako Klub Nautikoak eraiki zuen 1929an, eta hiriak betidanik itsasoarekin izan duen loturaren erakusgarri modernista da. Donostiaren historiaren lekuko zuzena ere bada, 36ko gerran frankistak han babestu baitziren, eta errepublikazaleek setiatu egin zituzten.
Lasala plaza
Antzoki Zaharraren ondoan, Donostiako bertsolaririk esanguratsuenaren omenezko kalea dago: Bilintx kalea. Hori jarraituz, Lasala plazara helduko gara, eta lehoi batekin egingo dugu topo. Harresia bota zuten arte, sabanako erregearen eskultura hiriko lehorreko ateko iturria zen, eta 1813ko erreketatik onik atera zen. Dagoeneko ez du urik botatzen, baina badu bere xarma, besteak beste, Txillardegik lerro batzuk eskaini baitzizkion.
Fermin Calbeton eta San Jeronimo kaleen izkina
Gaur egun, Parte Zaharra Donostiako auzo bat da, baina garai batean, lau auzotan banatuta zegoen. 1769tik aurrera banatu zuten lau auzotan, eta oraindik, banaketa horretako jatorrizko plaka bat ikusi daiteke Fermin Kalbeton eta San Jeronimo kaleen izkinan: Barrio primero jartzen du, eta 1813ko erreketaren ondorengoa da.
San Telmo museoa
Parte Zaharreko ibilbide honetan, derrigorrezko geldialdia da San Telmo museoa. Urgullen magalean dago, Pasealeku Berriko olatuetatik babestuta, eta Euskal Herriko historia ezagutzeko aukera izango duzu. Bestalde, ezin duzu Kearen eta lanbroaren artean erakusketa galdu: Sigfrido Koch Bengoetxearen argitaratu gabeko argazkiak baititu.
