Zuhaizti kiroldegia bost hilabetez itxiko dute hobekuntza lanak egiteko
Zuhaizti kiroldegiko gimnasioa.Donostiako Udala 
Maiatzaren 1ean itxiko dute Egia eta Gros auzoen artean dagoen Zuhaizti udal kiroldegia. BPXport enpresak kudeatuko du kiroldegia 2035. urtera bitarte, eta hobekuntza lan batzuk egingo ditu, bereziki estalkian eta ekipamenduetan. Gainera, adjudikaziodunak kirol zerbitzuen eskaintza hobetzeko obra osagarri batzuk egiteko konpromisoa hartu zuen. Guztira, 2,5 milioi euroko inbertsioa egingo dute.
“Hasiera batean obra horiek instalazioa irekita egin zitezkeela pentsatu bazen ere obra horien edukia zehatzago aztertu ondoren, lan horiek iraungo duten bost hilabeteetan ixtea komeni da, erabiltzaileen segurtasuna eta erosotasuna bermatzeko”, azaldu du Kiroletako zinegotzi Martin Ibabek. Zuhaizti kiroldegia urriaren 1ean irekiko da, erabat berrituta, eta Kirol Txartelaren abonatuek instalazioa baldintza beretan erabiltzen jarraitu ahal izango dute.
Egin beharreko obrek instalazioa erabat birgaitzea ekarriko dute. Alde batetik, estalkia osorik birgaitzeko proiektua garatuko da, narriadura zantzu nabarmenak baititu. Gainera, instalazio guztiak berrituko dira: saneamendua, aireztapena, elektrizitatea, telekomunikazioak, ura, klimatizazioa… Bi proiektu handi horien helburua da segurtasuna eta osasungarritasuna hobetzea eta energia aurreztea, estalki eta fatxaden isolamendu termikoaren bidez eta klimatizazio ekipo eraginkorragoak instalatuz.
Eraikina berritzeko beharrezkoak diren obra horiez gain, beste jarduketa batzuk egingo dira udal kiroldegi honetan eskaintzen diren kirol zerbitzuak hobetzeko. Jarduera nagusietako bat fitness gimnasioa izango da. Gimnasioak azalera handiagoa izango du, eta muskulazioa, kardiobaskularra edo entrenamendu funtzionala lantzeko eremuak izango ditu, azken belaunaldiko makinekin. Horrez gain, jarduera areto berriak eraikiko dira: wellness gunea (sauna, bainu turkiarra), ludoteka eta fisioterapia-zerbitzua, eta sarrerak, harrera-guneak eta bulegoak hobetzeko beste ekintza batzuk ere egingo dira.
Bai abonatuek bai ikastaroetako ikasleek apirilaren 30a arte izango dute kiroldegira joateko eta ordaindu eta hartu ezin dituzten kuotak konpentsatzeko modua aukeratzeko. Gaur egungo abonamendu edo inskripzio motaren arabera, honako hauek aukeratu ahal izango dituzte: Erriberetako kirol zentro berria erabiltzea, zentro horretan ematen diren jardueretan parte hartzea, kiroldegia berriz irekitzen denean kuotaren hobaria izatea edo ordaindutako kuotaren zatia itzultzea, ezin izango dutena. Gainera, zuzendutako jarduerak egiten jarraitu nahi duen pertsona orok izena eman dezake plaza libreak dauden Udalaren gainerako kirol instalazioetako ikastaroetan. Bestalde, Donostia Kirolak udako jardueren eskaintza indartuko du gainerako udal kiroldegietan. Halaber, gogoratu behar da Kirol Txartelaren abonatuak hiriko gainerako kirol instalazioak erabili ditzaketela.
