Ategorrietako sarraskian eraildakoak gogoratuko ditu EH Bilduk
Ategorrieta, gaur egun. (Argazkia: Inaxio Esnaola Aranzadi) Aurtengo maiatzaren 27an Ategorrietako sarraskia gertatu zenetik 90 urte beteko direnez, EH Bilduk dibulgazio, oroitzapen eta omenaldi ekitaldiak antolatu ditu. Ategorrietako sarraskiari buruzko bi hitzaldi emango ditu Josetxo Otegi historialariak: lehena maiatzaren 10ean emango du, Tomasene Kultur Etxean, 19:00etan; bigarrena maiatzaren 26an izango da Parte Zaharreko San Jeronimo kaleko Kriptan, 19:00etan. Maiatzaren 27an bertan, EH Bilduk Ategorrietako sarraskiko biktimei omenaldia egingo die, Ategorrietan, eta maiatzaren 30ean Ekialdean bizi eta lan. Acabemos con las desigualdades entre barrios lelopean egingo duten Hiri Martxan Ategorrietako sarraskiaren biktimak aitortzeko “keinuren bat” egitea aurreikusi dute.
EH Bilduk Donostiako Udalari iradokizun bat helarazi dio Ategorrietako Sarraskia instituzionalki aitortzeko. EH Bilduk azaldu duenez, udalak iradokizuna “aintzat” hartu du, “baina konpromisorik hartu gabe”. Aitortza instituzionala sindikatuekin eta bestelako eragileekin adostu beharko litzatekeela ere uste du EH Bilduk. “Jakin badakigu sektore zehatz batzuen aldetik Ategorrietako sarraskia eta, orokorrean, langile mugimenduaren borroka hiri honen kontakizunetik baztertu nahi dutela. Sektore horiek dira, hain zuzen, hiri zentralista eta elitistaren ereduaren defendatzaile nagusiak. Horien arabera, Donostiako aberastasun-iturri nagusia estatus altuko turismo eredua eta espekulazio urbanistikoa izan dira eta dira. Aitzitik, langile borrokak izan dira –eta dira oraindik ere– Donostiako hiri nortasunaren ezaugarri nagusietako bat, eta Donostian, Gipuzkoan eta Euskal Herrian dugun bizimodua lortu izanaren arrazoi nagusietakoa”, gehitu dute.
1931n Espainiako Bigarren Errepublika Eibarren aldarrikatu zutenetik hilabetera Ategorrietako sarraskia gertatu zen: “Donostian izan den langileen aurkako sarraskirik handiena”, Markel Ormazabal EH Bilduko zinegotziaren arabera. 1931ko maiatzaren 27an Guardia Zibilak 34 eta 19 urte arteko zazpi langile tiroz hil zituen Ategorrietan, eta 33 zauritu baino gehiago eragin zituen. Pasaiatik Donostiara zihoazen manifestazioan, “ogia eta askatasuna” eskatzeko. Izan ere, arrantzaleek atsedenerako egunak, soldatak handitzea eta portuko langileen baldintzak hobetzeko eskatu zieten armadoreei, eta horiek onartzen ez zituztenez, manifestazioa antolatu zuten Donostiara. Gobernu Zibilak ez zuen manifestazioa baimendu, eta guardia zibilak bidali zituen Ategorrietara, sarraskia eraginez.
“Donostiako herri memoria eraikitzeko” garrantzitsua da Ategorrietako Sarraskia oroitzea eta aitortzea, Reyes Carrere EH Bilduko bozeramailearen arabera. “Langileen mugimenduari errekonozimendua” egiteari ere garrantzia eman dio bozeramaileak, eta bere iritziz, “Guardia Zibilak Donostian marko juridiko oso desberdinetan izan duen paper errepresiboari buruzko gogoeta sakona egin behar da”.
