Reala B Bigarren Mailara igo da
Futbolean heldu dira asteburuko albisterik onenak talde donostiarrentzat: Realaren bigarren taldea Bigarren Mailara igo da, mutilen lehenengo taldea Europa Ligarako sailkatu da eta neskenak Atletico Madrilekin berdindu du. Eskubaloian eta saskibaloian, aldiz, porrotak izan dira.
Realaren bigarren taldeko jokalariak, Bigarren Mailara igo izana ospatzen, Xabi Alonso entrenatzailearekin. (Argazkia: Reala) 
Denboraldi bikaina ixten ari da Reala futbolean, mutilen lehenengo taldeak Kopa irabazi ostean, bigarren taldeak historia egin du asteburuan, Espainiako Bigarren Mailara igo baita; azken aldiz, 1961-1962 denboraldian jokatu zuen Bigarren Mailan. Xabi Alonsoren mutilek 2-1 irabazi zuten Algecirasen aurkako norgehiagoka, eta zilarrezko kategorian jokatuko dute datorren urtean. Ezkurdiak bere atean sartu zuen Algeciras aurreratu zuen gola, eta gauza bera egin zuen ondoren Figuerasek, partida berdiduz. 90. minutura 1-1 berdinduta heldu ziren, eta, luzapenean, Karrikaburuk egin zuen garaipenaren gola, nork bestela.
Mutilen lehenengo taldeak ere bikain itxi du denboraldia, Osasunari 0-1 garaitu ostean bosgarren postua eskuratu baitute Imanol Alguacilen mutilek, Europa Ligarako sailkatuz. Osasunak ez zuen ezer jokoan, baina ondo eutsi zituen Realaren erasoak, eta txuri-urdinei asko kostatu zitzaien gola egitea. Azkenean, Isaken eta Osasunako atezainaren artean, garaipenaren gola egin zuten txuri-urdinek, azken hamar minutuetan.
Nesken lehenengo taldea denboraldi ederra egiten ari da baita ere, eta 0-0 berdindu du asteburuan ligako lehenengo sailkatuaren aurka, Atletico Madrilen aurka. Natalia Arroyoren neskak laugarrenak dira sailkapenean, eta gelditzen diren hiru partidetan Txapeldunen Ligarako pasea ematen duen hirugarren postua eskuratzeko borrokatuko dute.
Eskubaloian, Bera Berak ezin izan dio bere denboraldiari azken lorpen garrantzitsua lortu, Kopatik kanpo gelditu baitira finalerdietan, Elxeren aurka 26-28 galdu ostean. Hala ere, txalotzeko moduko denboraldia egin dute donostiarrek, beste behin Liga irabazi baitute.
Saskibaloian, Gipuzkoa Basketek ez zuen ezer jokoan Andorraren aurkako partidan, Bigarren Mailara jaitsi baita dagoeneko matematikoki. Horrela, porrot handia jaso zuten gipuzkoarrek, Andorrak 105-71 irabazi baitzien. Datorren denboraldian saskibaloiaren maila gorenera itzultzeko borrokatuko dute.
ESKUBALOIA
Erreginaren Kopa, finalerdiak
Bera Bera 26 – Elx 28
FUTBOLA
Bigarren mailara igotzeko playoff finala
Reala B 2 – Algeciras 1
Emakumezkoen lehen maila, 30. jardunaldia
Reala 0 – Atletico Madril 0
Gizonezkoen lehen maila, 38. jardunaldia
Osasuna 0 – Reala 1
SASKIBALOIA
Gizonezkoen lehen maila, 36. jardunaldia
Andorra 105 – Gipuzkoa Basket 71
