Isabel II.aren etorbideko espaloi bat zabalagoa da dagoeneko
Isabel II.aren etorbideko atari bikoitien espaloia, berrituta. (Argazkia: Mikel Elkoroberezibar Beloki) Isabel II.aren etorbideko berritze lanak aurrera doaz. Atari bikoitiak dauden espaloiko lanak amaitu dituzte –taberna gehienak hor daude–, eta espaloia 6,37 metrokoa izatetik 13,55 metrokoa izatera pasatu da. Atari bakoitietako espaloiko lanak bi eta hiru hilabete artean atzeratuko dira, amiantozko hodiak agertu direlako: horiek kentzeko prozedurak atzeratuko ditu obrak.
2020ko azaroan hasi ziren berritze lanak, denboraldi batez udalak proiektua eten eta gero. Isabel II.aren etorbidearen berrikuntza lanei esker, oinezkoentzako guneak handitu egingo dira, eta zirkulazio bideak eta aparkamenduak berrantolatuko dituzte. Aldaketarekin, etorbideak dituen lau erreiak bi izatera pasako dira, orain arteko noranzkoak mantenduz. Zenbaki bikoitien espaloia dagoeneko zabaldu dute. Bakoitiena, bestetik, handituko da ere, baina neurri txikiago batean, errepideko aparkamendu lerro bakarra mantenduz. Bestalde, Irungo plazan ere hobekuntzak egingo dituzte.
