Bisita gidatuak egingo dituzte Artikutzan ekaineko igandeetan
Artikutzako herria, elizatik ikusita. (Argazkia: Joseba Parron). Ekaineko igandeetan bisita gidatuak egingo dituzte Artikutzan: parke naturaleko ekosistema eta historia ezagutzeko aukera izango da kirola eginez, zailtasun maila ezberdinekin. Ekainaren 13an egingo dute lehen bisita. Erraza izango da: Artikutza auzotik aterata Enobietako urtegi zegoen tokira joango dira. Ekainaren 20an, Artikutza auzotik aterata Altuetaraino igoko dira: pagadi eder bat zeharkatzeaz gain, Goizarineko burdinola zaharra ezagutzeko aukera ere izango da. Azken irteera ekainaren 27an egingo dute: Eskasetik abiatuta Elutsaraino joango dira, Erroiarri ur jauziaren ondotik pasata.
Bisita gidatuetan parte hartzeko Donostiako Udalaren webgunean izena ematea komeni da, edota 695 73 38 20 telefono zenbakira deituta edo idatzita ere izena eman daiteke. Neurrira egindako txangoak ere antolatzen dituzte.
