Gizon bat atxilotu dute Altzan, beste bat hil izana leporatuta
Igandean, goizaldeko 1:30ak aldera, gizon bat hilda aurkitu zuten Altzako Lauaizeta kalean, indarkeria zantzuekin. Eusko Jaurlaritzaren Segurtasun Sailaren arabera, larrialdi zerbitzuek abisua jaso zuten, eta osasun zerbitzuak iritsi zirenean, gizona hilda zegoela baieztatu zuten.
Ertzaintza ere bertaratu zen, eta inguruan odol arrasto handi bat zegoela ikusi zuten. Horrela, handik gertu aparkatuta zegoen autokarabana batean arropa odolez zikinduta zuen 32 urteko gizon bat aurkitu zuten. Identifikatu egin zuten, baita atxilotu ere, beste gizonaren hilketarekin zerikusia izatea leporatuta. Ertzaintzaren arabera, bi gizonek elkar ezagutzen zuten aurretik. Orain, gertatutakoa argitzeko ikerketa abiatu dute.
