Amara Berriko Ikasketa plaza Campezo enpresak berrituko du
Amara Berriko Ikasketa plaza. (Argazkia: Mikel Elkoroberezibar Beloki) 
Donostiako Udalak Campezo enpresari adjudikatu dio Ikasketa plaza berritzeko proiektua. 704.258 eurokoa da adjudikazio prezioa eta hamabi hilabeteko epean bukatu beharko dituzte lanak. Udalak maiatzean jakinarazi zituen adjudikazioaren xehetasunak, baina lanak aurrera eramango zituen enpresa arduraduna falta zen.
Plaza hainbat mailatan banatuta dago; beraz, lan horiei esker, harmailadi bat egingo da erdiko uhartearen inguruan, hesi fisikoak nahiz ikusizkoak kentzeko, eta goiko plataformaraino iristeko moduko ibilbide bat egingo da, bi arrapalen bidez. Goialdean, haurrentzako jolastokia egongo da, eta elementu eskultoriko bat izango du, haurren jolasgune nagusi gisa. Garajerako sarbideak ere berrituko dira, plazari lorategiak eta aireztapen tximiniak ezkutatzeko bereziki diseinatutako altzariak jarriko zaizkio eta argiztapen egokia bermatuko duten luminaria berriak jarriko dira.
Esku-hartze hau eremu publikoko eta eremu pribatuko obretan banatuta dago. Eremu publikoari dagozkionak udalak martxoan onartutako lizitazioari dagozkionak dira, eta udalak adjudikatu eta finantzatuko ditu. Eremu pribatuari dagozkionak, berriz, aparkalekuen egitura sendotzea da. Hobekuntza pribatu horiek egiteko, udalak 143.782 euroko diru laguntza eman zuen, herritar guztiei plaza irekitzeak dakarren interes publikoagatik.
