Aieteko osasun zentroak PIZTU programarekin bat egin du
Intzidentzia metatu altuena Aietekoa da. (Argazkia: Inaxio Esnaola Aranzadi) Donostia Kirolak eta Osakidetzak antolatutako PIZTU programan Aieteko Osasun Zentro berria eta Etxadi Kiroldegia sartu dira. Donostia Kirolak urtero 80.000€ inguruko aurrekontua bideratzen du programa finantzatzeko.
Programa hau jarduera fisikoa egiteko preskripzio, orientazio eta aholkularitza zerbitzua da, aktibo ez dauden pertsonentzat gehienbat. Helburua pertsona ez-aktiboak jarduera fisikoa egitera bultzatzea da, haien osasuna hobetzeko. Horrela, bat egin duten zentroetako medikuek edo erizainek ‘kirol-errezeta’ gomendatzen die gaixoei; hau da, jarduera fisikoa, eta Donostia Kirolaren orientatzailearengana bideratzen dituzte. Horrek, kiroldegietan nahiz osasun-zentroetan, jarraipena egingo dio 12 hilabetez, agindutakoarekin bat datorren ikusten joateko.
PIZTU programa 2017tik dator, eta 700 pertsona inguruk jaso dute kirol-errezeta. Horietatik %70ek erregularki egiten dute kirola. %66 emakumeak dira, eta %75 50 urte baino gehiagokoak. Patologiei dagokienez, ohikoenak obesitatea (%30), hipertentsioa (%28), diabetesa (%15) eta artrosia (%12) dira.
Esan daiteke programa fruituak ematen ari dela; izan ere, emaitza onak jasotzen ari dira. Kontuan izanda MET indize metabolikoa neurtzeko unitatea dela (atsedenean dagoen batek kontsumitzen duen energia kantitatea), parte hartzaileen %70ak 300 baino gutxiagoko met-a erakusten zuen joan aurretik. Sei hilabetera, %15ek mantentzen dute soilik. Gainera, %21 jaisten da erortzeko arriskua.
Osasun taldeak ere sortu dira programaren barruan, patologia jakin batzuk dituztenak edota jarduera erregularra egiten dutenak adibidez. Eragin positiboa du horrek bilakaeran.
