Udalak dio Easo plazaren zati berrituan ez dela iturririk jarriko dagoeneko beste bat dagoelako
(Argazkia: Mikel Elkoroberezibar Beloki) 
Easo plazako izkina berritzeko lanak oraindik ez dituzte bukatu, eta Amara Bai auzo elkarteak salatu du udalak ez dituela beteko proiektuan zehazturiko gauza batzuk. Batetik, iturririk ez jartzea erabaki dute, eta auzo elkarteak dio plaza batean “ezinbestekoa” dela hori. Udalak hedabide honi adierazi dio Ur eta Saneamendu sailaren erabakia izan dela iturririk ez jartzea, aurreikusten zen lekutik gertu dagoelako Osasun iturriaren erreplika.
Bestalde, auzo elkarteak adierazi du plazako eserlekuetan aurreikusitako LED argiak ez dituztela jarriko, “udalaren arabera mantentzea oso garestia delako”. Ordea, udalak esan du proiektuan ez dagoela aurreikusita LED argirik jartzea. “Badirudi zabaldu den infografian LED argiak daudela, eta hori omen da akatsa”, azaldu dute.
Easo plazaren aldaketak. (Irudia: Donostiako Udala)
