Antiguako Pilota Txapelketaren argazki lehiaketa antolatu du Txirain elkarteak
Aurreko urte bateko partidetako bat. (Argazkia: Antiguako Pilota Txapelketa) 
Antiguako Txirain elkarteak argazki lehiaketa antolatu du, hasi berri den auzoko 73. Pilota Txapelketaren bueltan. Larraintzarren hasi da Antiguako Pilota Txapelketa aurten, baina Antiguan jokatuko dituzte hurrengo jardunaldiak, eta hilaren 10ean, 11n, 17an, 18an, 24an, 25ean, 31n eta irailaren 1ean jokatuko dituzten partidetan egin daitezke argazki txapelketarako argazkiak.
Parte-hartzaile bakoitzak lau irudi aurkeztu ahalko ditu gehienez, eta txirain20@txirain.eus helbide elektronikora bidali beharko dituzte lanak, irailaren 1a baino lehen. Irabazleak 200 euroko saria irabaziko du. Informazio gehiago eskatu nahi izanez gero, aipatu helbidera idatzi daiteke, edo 943-31 28 54 telefono zenbakira deitu. Jarraian, argazki lehiaketaren oinarriak:
- Argazkiaren gaia: 73. Antiguako Pilota Txapelketako partidak.
- Partaide bakoitzak lau lan aurkeztu ahal izango ditu gehienez.
- Argazkiaren ezaugarriak: Argazkiek lotura zuzena izango dute 73. Pilota Txapelketako partidetako jokoarekin, koloretan zein txuri-beltzean bidali daitezke eta bidaltzaileak izan beharko du argazkien jabea, eta beste inon argitaratu gabeak izan beharko dute.
- Argazkiak nora bidali: txirain20@txirain.eus.
- Argazkiarekin batera adierazi beharko dira: Egilearen izen-abizenak, harremanetarako telefonoa eta e-mail-a.
- Antolaketa batzordeko idazkariak bereizi egingo ditu egilearen datuak eta argazkiak, epaiketa batzordeak argazki bakoitzaren egilea ezagutu ez dezan.
- Argazkiak bidaltzeko azken eguna: irailaren 1a.
- Saritua: Pilota Txapelketaren antolatzaileek eta Txirain Elkarteak aukeratutako batzordeak aukeratuko du argazki saritua.
- Saria: 200 euro.
- Argazki sarituaren berri ematea: Txapelketako Finalen egunean jakinaraziko da, garaikurren banaketarekin batera, irailaren 4an.
- Edozein zalantza sortuz gero, epaiketa batzordeak dauka azken hitza. 12 – Lehiaketa honetako parte-hartzaileek, bidalitako lanen jabe diren neurrian, argazkiak erabiltzeko eta jendaurrean erreproduzitzeko baimena ematen diote Antiguako Pilota Elkarteari nahiz Txirain elkarteari, euskarri inprimatuan edo digitalean, betiere, egilearen izena adieraziz eta Pilota Txapelketarekin edo Txirain Elkartearen jarduerarekin zerikusia duten argitalpenetan.
