Arraun Lagunakek historia egin du
Arraun Lagunakek denboraldia biribildu du asteburuan, bere historiako lehenengo liga irabazita. Eskubaloian, Bera Berak ere denboraldiko lehenengo garaipen garrantzitsua eskuratu du. Futbolean, ordea, asteburu gazi-gozoa izan da.
Arraun Lagunakeko neskek euren lehenengo liga altxa dute asteburuan. (Argazkia: Arraun Lagunak) 
Arraun Lagunak historia egiteko helburuarekin joan zen Zarautzera, eta helburua beteta itzuli da Donostiara, Euskotren Liga irabazi baitu, bere historian estreinakoz. Denboraldi guztian Oriorekin lehiatzen aritu da sailkapeneko lehenengo postua eskuratzeko, eta asteburuan ere hala aritu dira oriotarrak eta donostiarrak. Hain zuzen, Zarautzeko Ikurriñaren bi jardunaldietan Orio izan da lehenengoa eta Arraun Lagunak bigarrena, eta 39 puntura berdinduta amaitu dute sailkapen orokorrean. Ordea, denboraldian zehar eskuratutako garaipen guztiengatik, donostiarrak izan dira Euskotren Liga pareko honetako garaileak. Guztira, sei estropada irabazi ditu Arraun Lagunakek denboraldian, eta gainontzekoetan ere maila ona erakutsi du, goiko postuetan mantentzeko. Juan Mari Etxaberen taldeak pozaren pozez altxa zuen liga, eta garaipena zaleei eskaini zieten.
Donostiarrak, bere aldetik, igandean ezin izan zion eutsi larunbatean lortutako hirugarren postuari, eta Hondarribia euren gainetik gelditu zen estropadaren sailkapen orokorrean. Hala ere, liga hirugarren postuan amaitu dute, 24 punturekin.
Mutiletan, Donostiarra ondo lehiatu zen Zarautzeko uretan, eta hirugarren sailkatua izan zen estropadaren sailkapenean; ikurriña Hondarribiak eraman zuen. Horrela, ligako sailkapen orokorrean gora egiten jarraitzen dute, eta hirugarrenak dira dagoeneko, Zierbenaren aurretik, 125 punturekin.
Eskubaloian ere albiste onak heldu dira Donostiara, Bera Berak denboraldiko lehenengo garaipen esanguratsua eskuratu baitu asteburuan. Hain zuzen, Euskal Kopa irabazi du Barakaldoko Zuazoren aurka, finala 32-26 irabazita. Donostiarrek ondo hasi dute denboraldia, eta dena irabazteko helburuarekin jarraituko dute aurten ere.
Futbolean, aldiz, asteburu gazi-gozoa izan da. Albiste ona Sansek ekarri du, Xabi Alonsoren mutilek garaipena eskuratu baitute bigarren mailan egindako estreinaldian. Anoetan jokatu zuten larunbatean, eta 1-0 irabazi zioten Leganesi, Jon Karrikaburu golegile nekaezinak 57. minutuan egindako golari esker. Lehenengo taldea, aldiz, Camp Noun aritu zen atzo Bartzelonaren aurka, eta ez zen gai izan bere jokoa egiteko. Lehenengo zati oso txar baten ostean, bigarrenean hobeto atera ziren Imanol Alguacilen mutilak, baina 3-0 galtzen ari ziren 80. minutuan. Ordea, bi minututan bi gol eginda –debuta egiten ari zen Julen Lobetek lehenengo eta Oiartzabalek ondoren–, berdintzeko aukerak gertu ikusi zituzten txuri-urdinek azken minutuetan. Partidaren amaieran, ordea, laugarrena sartu zuen talde katalanak, eta Realak 4-2 galdu zuen.
