Beti dago bat Egian...
Udako oporrak amaitu eta gero, Barrexerka Egian izan da, eta auzolotsa ematen duten zenbait bizilagunekin egin dute topo. Porrontxoen ajearekin dagoen neska batekin egin dute topo, eta xolomo-gazta-piperra ogitartekoaren apologia egin du. Eskubaloi jokalari batekin ere aurkitu dira Koskoren inguruan. Aldapa jaitsita, Tabakalerako alkandoradun bat ikusi dute, eta berekin aritu dira hizketan. Kristinaenean, berriz, naturarekin lotura estua duten bi lagunekin egin dute topo. Bizilagun berezi gehiagok ere eman dute auzolotsa.
Auzolotsak atala sortu dute Irutxuloko Hitzak eta Barrexerkak: esketx sorta bat da, eta hilabetean behin Donostiako auzo batean izango dira Barrexerkakoak, auzo bakoitzeko pertsonaiak ezagutu eta barrea eragiteko. Orain arte Groseko eta Antiguako auzolotsak erakutsi dizkigute Barrexerkakoek.
