Axular Lizeoak espaloi jasangarria eraiki du
Axular Lizeoko sarrera, espaloi jasangarriarekin. (Argazkia: Inaxio Esnaola) 
Birziklaturiko 50.000 plastikozko botilekin espaloi iraunkor eta jasangarria eraiki du Aieteko Axular Lizeoak. Egitasmoa Gipuzkoako Foru Aldundiko Ingurumen sailarekin batera garatu dute. Lehen zatiaren aurkezpena egin dute gaur goizean, eta eskolan izan dira Aitor Uriondo Axular Lizeoko zuzendaria, Jose Ignacio Asensio Ingurumen diputatua eta Marisol Barral Campezo Berrikuntza Taldeko arduraduna.
Egitasmoaren aurkezpenean protagonista guztiek parte hartu dute. (Argazkia: Inaxio Esnaola)
Zoru birziklatuaren lanak uztaila eta abuztua bitartean egin zituzten, Eko-REC eta Ekomodoren laguntzarekin. Horrela, ikastetxean zoru birziklatuko sarbide berria egin dute, eta bide publikoarekin lotu. Orain arte, Axular Lizeoak sarbide bakarra zuen, bai ibilgailuentzat eta bai oinezkoentzat. Egitasmo honi esker, irisgarritasunerako oztopoak, errepidearen erabilera desegokia eta segurtasun arazoak saihesten dira.
Esan bezala, birziklatutako 50.000 plastikozko botila erabili dira asfaltoa egiteko. Ondoren, botila horien tapoiak erabiliko dira oinezkoentzako sarbidean jarriko diren eserlekuak eta paperontziak eraikitzeko. Birziklatutako paperontzi horiek hondakin gehiago bildu eta birziklatzeko balioko dute.
