EH Bilduk "Parte Zaharreko" eta "Donostiako Gazteria Mahaia" sortzea proposatu du
Joan den astean protesta egin zuten Ikatz kaleko tabernariek. (Arg: Beñat Parra) 
Azken aste eta hilabeteetan “bizikidetzako arazoak eta jarrera bandalikoak” areagotu dira EH Bilduren arabera, eta honi aurre egiteko elkarrizketa mahaiak sortzea proposatzen du: “Parte Zaharreko Mahaia” eta “Donostiko Gazteriaren Mahaia”.
Koalizioa “modu diskretuan” biltzen aritu da hiriko Auzo elkarteekin, gazteekin, ostalaritza sektorearekin, sindikatuekin, Udaltzaingoarekin eta gizarte mugimenduekin. Koalizioaren ustez “Udal Gobernuko eta Eusko Jaurlaritzako ordezkariek gai hau ‘ordena publikoko’ arazo bihurtu nahi izan dute, arazoa konpondu beharrean kontrako efektua lortuz”.
Egin duten diagnostikoaren arabera Parte Zaharreko egoera, auzoa “parke tematiko bihurtu nahi izan duten guztiek urte askoan landatutakoaren uzta da”. “Botiloiak Parte Zaharrera bideratu izanak” bertako bizilagun eta ostalarien “arazoak areagotu besterik” ez ditu egiten koalizioaren ustez.
Gazteei dagokionean, aisialdirako eskaintza falta eta pandemiak sortu dituen buru osasun arazoak ekarri dituzte gogora: “alkohola kontsumitzeko aisiarako alternatibarik ez da landu”. Polizia eredua ere aipatu du oharrean, izan ere EH Bilduren ustez “Gai hau tabu bihurtu nahi duten arren, Udaltzaingoak berak ere onartzen du soluzioa ez dela bide polizialetik etorriko”.
“Parte Zaharreko Mahaia” sortzea proposatu du: auzotarrek, merkatari- ostalariek eta Udalak osatuko lukete, “elkarbizitzarako akordio egonkor bat lortzeko eta auzo ereduari buruzko eztabaidari berriro ekiteko”.
Bestetik, “Donostiako Gazteriaren Mahaia sortzea” proposatzen dute, “epe labur, ertain eta luzerako aisialdi alternatibei buruzko eztabaidan inplikatu behar dira gazteak. Enpatiatik eta entzutetik abiatuta, gazteen beharrak eta eskaerak antzemateko, proposamenak jasotzeko eta haiekin eta adituekin lantzeko”.
Azkenik, irtenbidea ez dela errepresioaren eskutik etorriko, dio koalizioak: “Edozein irtenbidek bi auzi hauei heldu behar die: gaur egun zer aisialdi-aukera eskaintzen dizkiogu gazteriari eta zer auzo-eredu nahi dugun Parte Zaharrerako”.
