Exijentzia handiko beste partida bat eta beste puntu bat
Turrientes jokalari gaztea, Monacoren aurkako partidan. (Argazkia: Reala) 
Realak Monaco jaso zuen atzo Anoetan, eta partida on bat jokatu bazuen ere, ezin izan zuen garaipena eskuratu; 1-1 amaitu zen partida. Txuri-urdinek talentua eta gogoa jarri zituzten hasieratik, eta Monacokoek, aldiz, muskulua eta ordena defentsiboa. PSVren aurka jokatutakoa bezala, exijentzia handiko neurketa izan zen atzokoa; Europako neurketa bat, alegia.
Lehenengo minutuetan Realak gerturaketa batzuk egin bazituen ere, Monaco izan zen markagailuan aurreratu zena, 15. minutuan. Korner batean izan zen, Disasi denen gainetik altxa baitzen, erdiraketa errematatu eta, zorte pixka batekin —zutoinean jo ondoren, Remiroren bizkarrean jo zuen eta barrura joan zen—, lehenengo gola egiteko.
Realak ez zuen etsi, eta bere estiloari eutsi zion, baita berdinketaren gola egiten ahalegindu ere. Merino izan zen zelai erdiaren jaun eta jabe: goitik dena irabazi zuen, baloi ugari lapurtu zituen eta pase bertikal arriskutsuak eman zizkion Porturi. Azken honek, aurrelari lanetan, sakontasuna eman zion txuri-urdinen erasoari, eta ez zen kikildu bera baino askoz handiagoak ziren atzelarien aurrean. Oiartzabalek aukera argi bat izan zuen, eta Elustondo ere saiatu zen falta bat errematatuz, baina ezer, Monacoren ateak gaindiezina zirudien. Tartean, Remirok jaurtiketa arriskutsu bat gelditu zuen besoarekin.
Bigarren zatian, aldiz, lehenengoan baino biziago atera zen Reala, eta Portuk baloi ezinezko horietako bat presionatu zion Monacoko atezainari, honek gaizki despejatu zuen eta gol aukera bat izan zuen Portuk berak, erremate akrobatiko batekin; baina Monacokoek kornerrera bidali zuten. Hain zuzen, korner horretan heldu zen Realaren gola: Januzajek baloia buruan jarri zion Merinori, eta honek erremate bikaina egin zuen, baloia sarera bidaltzeko.
Hortik aurrera, minutu onak izan zituen Realak, eta gol aukera batzuk ere izan zituen, baina ezin izan zuen bigarrena sartu. Golegile baten falta sumatu zuten Alguacilen mutilek, nahiz eta amaieran Karrikaburu zelairatu zuen entrenatzaileak. Pixkanaka, neurketaren bizitasuna hozten joan zen, eta berdinketarekin amaitu zen partida. Horrela, bi puntu ditu Realak Europa ligan, eta launa Monacok eta PSVk; lehenengo postua eskuratzeko aukerak ditu oraindik Realak, baina garrantzitsua da horretarako Sturm Grazenen aurkako bi partidak irabaztea.
