Iztuetako trenbidearen zubi berria jartzeko lau egun beharko dituzte
Iztuetako lanak. (Argazkia: Donostiako Udala) 
Iztuetako trenbideko zubiaren egitura berria prest dago, eta datorren larunbatetik aurrera jarriko dute. Zehazki, Gros eta Egia lotzen dituen eremuko lan horiek hilaren 9tik 12ra egingo dituzte. Asteburua eta zubia aprobetxatuko dituzte obra hasi eta bukatzeko. “Lau egun gogor” izango direla aitortu du Duñike Agirrezabalaga Hiri Proiektuen zinegotziak.
Lanak atsedenik gabe egingo dituzte larunbateko 00:00etatik astearteko 05:00etara. “Lan horiek bizilagunei eragin diezaieketen barkamena berretsiko da; izan ere, laster amaituko dira obra horien gaueko eragozpenak, eta nabarmen aldatzen ari dira zonaldearen fisionomia”, azaldu du Agirrezabalagak.
Azken egunetan zubiaren egitura metalikoa muntatzen aritu dira, eta behin betiko kokatzeko prestatu dute. Izan ere, egitura patinen eta kantuen bidez irristatuko da kokatzeraino. Lanek iraun bitartean tren zerbitzurik ez da egongo. Inguruan egiten diren trenbide konexioak autobus zerbitzu bidez egingo dira, egungo bidea desagertu egingo baita zubi berria muntatzeko eta bide berriak eta dagozkion instalazioak, katenariak eta gainerakoak jartzeko.
Tren zirkulazioa berreskuratuta, lursaila zulatzen hasiko dira trenbide azpiko bide berria eraikitzeko, Iztuetako zubibidea ordezkatuko duena. Horrez gain, gerora egingo diren urbanizazio lanak aintzat hartuta, obra guztia 2022ko apirilerako bukatua egotea aurreikusten du udalak.
