Realak lidergoa indartu nahi derbia irabazita
(Argazkia: Reala) 
Kopako finala elkarren aurka jokatu zutenetik ez dituzte indarrak berriz ere neurtu. Realak Athletic hartuko du etxean igandean, 21:00etan. Derbia berezia izango da, Koparen ostekoa delako, eta txuri-urdinak ligako lehen postuan sendo jarraitzen dutelako. Atzo Celtari irabazi ostean (0-2), lidergoan daude 24 punturekin. Postu gorenean irauteko ezinbestekoa izango da Realarentzat Athletic mendean hartzea. Ez da neurketa erraza izango, eta seguru bi taldeen zaleek Anoetan behar bezala gozatzen dutela.
Realeko neskek, berriz, Bartzelona liderraren zelaian jokatuko dute igandean, 12:00etan. Neurketa erabakigarria izango da berresteko denboraldi hasiera bikaina egin dutela. Hain zuzen ere, Reala sailkapeneko bigarren postuan dago, Bartzelonaren atzetik. Ezustekoa emango balute lehen postuan berdinduta geratuko lirateke. Kataluniako taldea beste maila batean dagoela erakutsi dute, baina Realak erakutsi du indartsuenen aurka ere lehiatzen badakiela.
Eskubaloian, Bera Bera taldeak aste paregabea darama. Pasa den igandean Paris 92 kanporatu ondoren, Europako bideari jarraipena eman diote. Ligan Elx menderatu zuten herenegun, eta Granollers izango dute parez pare bihar 16:30ean. Hirugarren partida jarraian irabazteko gai izango ote dira?
Saskibaloian, Ibaeta Basketek etxeko lanak etxetik kanpo ere egiten saiatuko da. Bigarren garaipena eskuratuta, Galizian ariko dira igandean Lugoko taldearen kontra. Biek bina garaipen dituzte, eta Donostiakoek irabaziz gero aukera dute beheko postuetatik zertxobait ihes egiteko.
Izotz hockeyan, Txuri Urdineko neskak sasoi betean daudela nabarmendu behar da. Dena irabaztearekin batera, pistan maila oso ona erakutsi dute. Orain arteko arerio zailenaren kontra ariko dira bihar iluntzean: Majadahonda. Donostiako taldeak baino garaipen bat gutxiago du, eta sailkapenean atzetik dute. Bi taldeek gol asko sartu dituzte orain arte, eta beraz, baliteke gol askoko lehia izatea. Gizonezkoen taldeak, berriz, Milenio Panthers hartuko du bihar iluntzean Izotz Jauregian. Pasa den jardunaldian Jacari irabazita, konfiantza berreskuratu dute. Ez da liga hasiera erraza izaten beraientzat.
PARTIDAK
Futbola
Emakumezkoen lehenengo maila, 8. jardunaldia
- Bartzelona – Reala (igandea, 12:00)
Gizonezkoen lehenengo maila, 12. jardunaldia
- Reala – Athletic (igandea, 21:00)
Saskibaloia
Emakumezkoen lehenengo maila, 7. jardunaldia
- Ensino Lugo – Ibaeta Basket (igandea, 13:15)
Eskubaloia
Emakumezkoen Ohorezko maila, 7. jardunaldia
- Granollers – Bera Bera (larunbata, 16:30)
Izotz hockeya
Gizonezkoen lehenengo maila, 7. jardunaldia
- Txuri Urdin – Milenio Panthers (larunbata, 14:30)
Emakumezkoan lehenengo maila, 6. jardunaldia
- Majadahonda – Txuri Urdin (larunbata, 21:45)
