'Aditu' aurkeztu dute, gortasunetik sortutako dantza ikuskizuna
Jone San Martinek dantza garaikidearen eta gortasunaren arteko harremana aztertu du Aditu ikuskizunaren bitartez. Azaroaren 12an eta 13an izango da ikuskizuna, Tabakalerako Patio aretoan. Sarrerak salgai daude dagoeneko webgunean eta lehen solairuko Info Puntuan.
Azken hilabetean Tabakalerako Artisten Gunean burututako izen bereko (Aditu) ikerketa-prozesu batetik abiatuta sortutako pieza da. Jone San Martin koreografo eta dantzariak eta Mikel R. Nieto komisario, artista eta ikertzaileak zuzendutako egitasmo honek zeinu hizkuntza darama erdigunera. Ikuskizunaren koreografiaren oinarri da hizkuntza hori, eta hortik eratorritako mugimenduak, keinuak eta teknologia ezberdinen bidez jasotako soinuak nabarmentzen dira. Antolatzaileen iritziz, “ikuskizunak, entzumenaren mugak marrazten ditu soinuaz gorputzaren bidez gozatzeko”.
Aditu
Prentsaurrekoan azaldu dutenez, aditu hitza, euskaraz, entzutea, ulertzea, usaintzea, hautematea edo ados jartzea da. Latinez, berriz, “aditus” hitzak hurbildu edo zuzendu esan nahi du. Dantza garaikideko pieza honek “bestearengana hurbiltzeko eta harengana jotzeko aukera ematen du, entzuteak hautemateko, ulertzeko eta ulertzeko duen gaitasunetik abiatuta. Horrela, proiektu honen izenak bestearekin elkartzeko nahia islatzen du hizkuntzaren, isiltasunaren eta gorputzaren bidez, hizkuntza ororen presentzia eta gabezia batuz eta gorputzaren eta entzumenaren bidez hitz eginez”.
Azaldu dutenez, entzumen arazorik ez duten pertsonentzat, “normoentzuleentzat”, entzumen pertzepzioaren inguruko jolasa izan daiteke. Entzumen patologiaren bat duten pertsonentzat, berriz, “soinua beren gorputzetan aske eta zuzenean sentitzeko gunea izango da”. Ikuskizun honen bidez, zeinu hizkuntzaren berezko keinuak balioan jarri nahi dira, eta ahozko hitzaren eta entzumenaren inguruak aztertu.
Iñaki Montero, ‘Aditu’-n parte hartuko duen pertsona gorra. (Argazkia: Xalba Ramirez)
Fitxa teknikoa
Zuzendaritza artistikoa: Jone San Martin & Mikel R. Nieto
Koreografia eta argiak: Jone San Martin
Soinu-artista: Mikel R. Nieto
Lutheria esperimentala: Jonathan Garcia Lana/Tunipanea
Antzezleak: Jone Amezaga, Amancio Gonzalez, Iñaki Montero, Oihana Munduate, Jone San Martin, Kate Strong.
Jantziak: Mihise
