Donostia ur azpian ageri da etorkizunean
Ulu Mediak ‘Artxipelagoa’ fikziozko podcasta sortu du EITB Podkast plataformarako. Lehen sasoia laster bukatuko da, zortzigarren atalarekin. Oier Aranzabal eta Juan G. Andres dira zuzendariak, eta ahots ezagunak entzun daitezke istorioaren kontakizunean.
Eskuinetik hasita, Juan G. Andres zuzendari lanetan, Xanti Salvador soinu teknikaria, Anartz Zuazua eta Eneko Sagardoi. (Argazkia: Ulu Media) 
«2103. urtea. Hiru Olatuek Europa ia osorik urpean utzi dute. Itsasoaren maila 500 metro igo da, eta salbu geratu diren lur apurrak hiri estatuetan antolatu dira. Euskal Artxipelagoa deiturikoaren kasua da. Bertan Jare bizi da, mundu zaharraren aztarnak ezagutu nahi dituen neska gaztea». Horrela dio Artxipelagoa audio fikziozko telesailaren sinopsiak. Donostia eta gainerako euskal hiriburuan urpean ageri dira, eta horren arrazoia argitzeko audio telesaila entzun eta istorioan barneratzea ezinbestekoa da.
Ulu Mediak ekoiztu du, eta urriaren 4an estreinatu zuen EITB Podkast plataformak. Ordutik, astelehenero atal berri bat plazaratzen ari dira. Aste honetan seigarrena aurkeztu dute, eta beste bi falta dira lehen sasoia bukatzeko. Izan ere, zortzi atal izango ditu. Oier Aranzabal zarauztarra eta Juan G. Andres donostiarra dira Artxipelagoa telesailaren zuzendariak. «Oierri okurritu zitzaion, pandemia aurretik. Harena izan zen ideia nagusia. Gerora, Martin Etxeberria eta Xabier Etxeberria anaiekin eta nirekin konpartitu zuen. Lauron artean eman genion forma hasierako ideia horri», azaldu du Juanek. Hain zuzen ere, pandemia baliatu zuten Ulu Media sortu eta proiektua garatzeko.
«EITBri proiektua aurkeztu eta hitz egiten hasi ginen. Oso erakargarria iruditu zitzaien, orain arte irrati nobelak egin izan direlako, baina ez maila honetakoak. Ez gara aitzindariak izan, baina maila honetako soinu fikzio bat euskaraz ez da egin orain arte», dio Juanek. Gaur egungo telesailek duten «kalitate estandarra» bilatzea erabaki zuten. «Horregatik, zineman diharduten pertsonengana jo genuen. Adibidez, Xanti Salvador soinu ingeniariarekin lan egitea erabaki genuen. Goya sari bat irabazi zuen La Trinchera Infinita filmari esker. Koldo Corella bazkidearekin batera duen estudioan lan egitea erabaki genuen».
Euskal aktoreen ahotsak
Gidoiak lantzen lau edo bost hilabete eman ondoren, istorioa kontatzeko ahots aproposen bila hasi ziren. «Iazko urte amaieran, casting moduko bat egin genuen ahotsak aukeratzeko. Euskal aktoreengana eta bikoizleengana jo genuen. Ahots protagonistak aktoreak izatea nahi genuen, zinema kutsu hori lortzeko», esan du Juanek. Horrela, Aitziber Garmendia, Eneko Sagardoi, Anartz Zuazua, Iñaki Beraetxe, Sara Cozar eta Klara Badiola «fitxatu» zituzten. «Gogoan dut Aitziber [Garmendia] eta Eneko [Sagardoi] zeharo harrituta geratu zirela audio fikziozko proiektuarekin. Baita Iñaki [Beraetxe] bera ere».
Aktore zuzendaritza garrantzitsua izan dela nabarmendu du Juanek: «Oso argi genuen aktore zuzendari bat behar genuela, eta oso gustura ibili gara Anartz Zuazuarekin. Testuak irakurri beharrean, interpretatzeko eskatu zien aktoreei, eta horrekin emaitza biribilagoa lortu dugula iruditzen zait. Zinemaren esentzia jaso dugu audio fikzioan».
Grabazioak otsailean egin zituzten Xanti Salvadorren eta Koldo Corellaren estudioan. «Ahots guztiak bi astetan grabatu genituen. Aldiz, zortzi atalen audio postprodukzioa azken astetan bukatu dugu», dio Juanek. Atal bakoitza ordu erdi ingurukoa da, nahiz eta iraupenari ez dioten gehiegi erreparatu. «Azken batean, podcast bat izanik, ez da programazio batean txertatu behar. Beraz, gutxi gorabehera ordu erdiko atalak egitea erabaki genuen». Dena dela, bakoitza osatzeko behar izan duten denbora askoz ere gehiago dela aitortu du Juanek: «Ordu asko sartu ditugu, baina merezi izan du».
Kursaalean lehen bi atalen aurkezpena egin zuten, eta, oro har, harrera ona izan zuen gonbidatuen artean. Atal berriak estreinatu ahala, iritzi gehiago jaso dituzte. «Euskal kulturako hainbat pertsona ezagunek esan digute gustatu zaiela. Beste batzuek, berriz, harrituta geratu direla aitortu digute. Egia esan, gure lan taldeko aktore batzuek sentsazio bera izan dute emaitzarekin», adierazi du Juanek.
Entzungailuekin
Podcastak kontsumitzeko hainbat modu daude. Batzuk lana edo bestelakoak egin bitartean kontsumitu daitezke. Artxipelagoa gisako audio fikzioek, berriz, «arreta eta patxada» behar dutela uste du Juanek: «Entzungailuak jantzi eta lasai entzutea komeni da. Istorioaren detaile guztiez gozatzeak merezi du».
