New Orleansko musika eta erresistentziari buruzko liburua aurkeztuko dute Kaxildan
Liburu aurkezpena antolatu du Kaxilda liburu dendak ostegunean, hilak 18, 18:30etan. Jacobo Riveroren Bulbancha: musika, kalea eta erresistentzia New Orleansetik liburua aurkeztuko dute. Lily Keber zinegilearen hitzaurrea du liburuak, eta Clave Intelectualek argitaratu du. Ekitaldia gaztelaniaz izango da.
Dokumental formatuko hamalau istorio eta hiriari lotuta dauden pertsonekin izandako elkarrizketa ugariren bidez, “New Orleansen erretratua eskaintzen du liburu honek, lankidetza kolektiborako gune gisa eta errebeldia politiko eta artistikoaren eredu gisa”. Kubako Santiago, Haiti edo Lavapies aipatzen dira, New Orleanseko soinua bezala ezagutzen duguna sortu duen mestizaje kulturalaren historia berreraikitzeko. Bidaia horretan, Louis Armstrong, Federico García Lorca, Sweet Emma, Allen Toussaint, James Booker, Cole Williams edo Leyla McCallarekin egingo da topo, eta bertatik bertara ezagutuko dira “flandestar diasporaren zorigaitzak eta ibilerak, Black Lives Matterren jarduera nekaezina eta Nazioarteko Brigaden borroka ausarta”. Lan “apologetikoa da, musika erresistentziarako tresna gisa, komunitate solidoen eraikuntza eta sormen indibidual eta kolektiboaren indar kontestarioa defendatzen dituena”.
Jacobo Rivero (Madril, 1974) kazetaria eta idazlea da. El País, El Salto eta Más Jazz Magazine aldizkarietan kolaboratzaile. Bulbancha: musika, kalea eta erresitentziak lanaz gain, New Orleansetik El ritmo de la cancha (2012) eta Del juego al estadio (2014) argitaratu zituen. Kultura, kirola eta politikari buruzko beste liburu batzuk ditu argitaratuta. Zinema dokumentalean, Fernando León edo Javier Corcuera zuzendariekin lan egin du, eta zuzendari-laguntzaile eta dokumentalista gisa lan egin du La Polla Records punk talde mitikoaren historiari buruzko No somos nada (2021) filmerako.
