Lehen postuari begira jarraitzeko partida du Anoetan Realak
2020/2021 denboraldiko Reala-Real Madril partida. Irudian, Aritz Elustondo baloiarekin. (Argazkia: Reala) Realeko mutilek ligako liderraren aurka, Real Madrilen aurka, jokatuko dute larunbat gauean Anoetan. Duela gutxi txuri-urdinak zeuden sailkapenaren lehen postuan, baina azken lau partidetatik bakarra irabazi dute donostiarrek, eta hirugarren postura jaitsi dira. Real Madrilekiko distantzia bera mantentzeko edo gerturatzeko aukera dute bihar Imanol Alguacilen jokalariek, baina aurrean Europako talderik onenetariko bat izango dute. Atletiko Madrilek Realak bezain beste puntu ditu, 29, eta bigarren postuan da, partida bat gutxiago jokatuta. Realaren atzetik Sevilla dago, 28 punturekin, eta Andaluziakoek ere txuri-urdinek baino partida bat gutxiago jokatu dute.
Realeko neskek Madrilera egingo dute bidaia, Madril CFFren aurka jokatzeko. Nahiz eta Espainiako Federazioak txuri-urdinei hiru puntu kendu, Natalia Arroyoren jokalariek puntu andana biltzen jarraitzen dute, eta bigarren postuan mantendu dira, 24 punturekin. Atzetik Atletiko Madril dute, hiru puntu gutxiagorekin. Madril CFF sailkapenaren zazpigarren postuan dago, hamazazpi punturekin. Azken hiru partidak jarraian irabazi dituzte txuri-urdinek, Tenerife eta Atletiko Madril bezalako aurkari gogorren aurka.
Saskibaloian, Ibaeta Basketek jaitsiera postuetatik aldentzeko eta sailkapen postuetan sartzeko Logroñoko Campus Promete garaitu beharko du igandean. Etxetik kanpo jokatuko dute donostiarrek, eta partida irabazteak asko gerturatuko lituzkete sailkapen fasera. 30 partidako liga da, eta hamar jokatu dituzte jada; liga asko geratzen zaie oraindik donostiarrei.
Izotz hockeyan, Txuri Urdineko mutilak Kosner Huarteren aurka arituko dira etxetik kanpo. Hamar partida jokatuta eta hamabos puntu bilduta, laugarren da Txuri Urdin; lehena hamalau puntura du, seira bigarrena eta bostera hirugarrena. Atzetik, puntu bat gutxiagorekin, Bartzelona du, baina bi partida gutxiago jokatu dituzte katalanek. Huarte azken aurreneko postuan dago, bederatzi punturekin.
PARTIDAK
Futbola
Gizonezkoen lehen maila, 16. jardunaldia
- Reala – Real Madril (Larunbata, 21:00)
Emakumezkoen lehen maila, 12. jardunaldia
- Madril CFF – Reala (Igandea, 13:00)
Izotz Hockeya
Gizonezkoen lehen maila, 11. jardunaldia
- Kosner Huarte – Txuri Urdin (Larunbata, 14:45)
Saskibaloia
Emakumezkoen lehen maila, 11. jardunaldia
- Campus Promete – Ibaeta Basket (Igandea, 13:00)
