Arte garaikidean egindako bideagatik sarituko dute
Esther Ferrer artista donostiarrak jasoko du 2022ko Urrezko Danborra. Donostiako Udaleko Bozeramaileen Batzordeak aho batez hartu du erabakia.
Esther Ferrer performance art izeneko jarduera artistikoan Europako artista onenetako bat da. (Argazkia: Nerea Lizarralde) 
Urrezko Danborra eskuratzeko 76 hautagaien zerrenda argitaratu zuen Donostiako Udalak, azaroaren 26an. Horien artean zegoen Esther Ferrer artista donostiarra. Azaroaren 29tik abenduaren 3ra arte, Bozeramaileen Batzordeak hiru hautagaitza aukeratu behar zituen herri bozketarako. Baldintza bakar batek eten zezakeen prozesu hori; adostasun handia lortzea udal taldeek –udalbatzaren hiru herenak; 27 zinegotzietatik 18–. Horrela gertatu zen, eta abenduaren 3an Bozeramaileen Batzordeak aho batez erabaki zuen 2022ko Urrezko Danborra Esther Ferrer artistari ematea.
Diziplina desberdinak landu ditu 1937an Donostian jaio eta egun Parisen bizi den artistak. Performance art izeneko jarduera artistikoan Europako artista onenetako bat da. 2008an Espainiako Arte Plastikoen Sari Nazionala jaso zuen, eta 2014an Arte Plastikoen Velazquez saria. Donostiara tarteka etorri izan da bere erakusketak aurkeztera, eta mintegietan parte hartzera. Ondo bidean, 2022ko urtarrilean ere etorriko da, Urrezko Danborra jasotzera.
Ados jarri dira
Donostiako bost udal taldeek babestu dute Esther Ferrer artistaren hautagaitza. Hedabide hau guztiekin jarri da harremanetan, eta PPk izan ezik, gainerakoek Ferrer aukeratzeko arrazoiak azaldu dituzte. Eneko Goia alkateak adierazi du arte garaikidean «muga berriak» finkatu dituela: «Hiriak kulturaren alde egiten duen apustu nabarmena berretsiko dugu sari honen bitartez».
Iritzi berekoa da EAJren bozeramaile Jon Insausti: «Aitzindaria izan da Euskadin arte garaikidearen diziplinan, bereziki performanceak egiten. Gainera, lan egiteko duen modua askotarikoa da. Izan ere, bere gorputza zein argazkiak, bideoak eta beste hainbat materialaren erabilera uztartzen ditu bere obrak sortzeko». Ferrerren gisako emakume batek Urrezko Danborra irabaztea esanguratsua dela gaineratu du Insaustik. «Erabat azkar doan gizarte batean, badu gugan eragiteko ahalmena. Poztekoa da adindua den emakume donostiar batek horrelako ahalmena izatea».
Reyes Carrere EH Bilduko bozeramailearen ustez, Ferrer betidanik emakume «apurtzailea eta iraultzailea» izan da, «bere burua feministatzat identifikatzeko beldurrik izan ez duena, baita garai zailenetan ere». Era berean, artistaren sormena goraipatu du: «Bere sorkuntzan erakutsi duen balentriak eredu izan beharko luke hurrengo belaunaldientzat. Izan ere. erakutsi duen ibilbide artistikoan zehar, leiala izan zaio bere sorkuntza artistikoari, unean uneko errealitate sozialari uko egin gabe».
Ferrer arte garaikidean «nazioarteko erreferente» bat dela adierazi du PSE-EEko bozeramaile Marisol Garmendiak: «2022ko Urrezko Danborrak emakume donostiar bat sarituko du, eta, era berean, artista honen ibilbideari aitortza egingo dio. Abangoardiako artista bat da Ferrer, arte plastikoetan berritzailea, eta Donostiak eman duen arte belaunaldi esanguratsu bateko kidea da. Gabriel Zelaiak nabarmendu gisara, gure hiria irekia eta kosmopolita da».
Aitzole Araneta Elkarrekin Donostiako bozeramaileak Ferrerrekin lan egiteko aukera izan du: «Pertsona apala da, kolaboratzailea eta diskurtso artistiko handia duena. Politikoki ere artista ausarta da. Bestalde, ez da artista mainstream bat, baina Urrezko Danborraren balioak ordezkatzen ditu».
