Txuri Urdinek asteburu erabakigarria du aurretik
Txuri Urdineko mutilak. 
Txuri Urdin izotz hockey taldeko mutilek atzeratutako bi partida jokatuko dituzte. Bihar Bartzelonaren pistan ariko dira, berriz ere, eta pasa den asteko garaipena errepikatzen ahaleginduko dira. Hori gutxi balitz, etzi Logroñon jokatuko dute Milenio Panthers taldearen kontra. Bi neurketak irabaziz gero ligako titulurako kanporaketak jokatzeko aukerak izango lituzkete. Neskek, berriz, ligako titulurako finalerako txartela izango dute jokoan. Bihar jokatuko dute finalerdietako kanporaketako bigarren partida etxean, Valdemororen aurka (14:30). Lehen neurketa irabazi ostean, bigarrena behar dute finalerako sailkatzeko. Madrilgo taldeak irabaziko balu, kanporaketako hirugarren partida jokatuko lukete etzi leku eta ordu berean.
Belar hockeyari dagokionez, emakumezkoen ohorezko maila bueltan da. Realak azaroan jokatu zuen etenaren aurreko azken neurketa, eta berdindu egin zuen. Sailkapeneko azken postuetatik ateratzeko Egara menderatu beharko dute etzi, Aieteko zelaian.
Futbolean, Realeko lehen mailako bi taldeek ez dute atsedenik izango. Gizonezkoek Real Madrilen kontra jokatuko dute bihar gauean, Santiago Bernabeu futbol zelaian. Azken bi neurketak jarraian irabazita, hirugarrena ere nahi dute txuri-urdinek. Ordea, ez da batere erraza izango. Aurrez aurre ligako egungo liderra izango dute. Aldiz, emakumezkoek euskal derbia jokatuko dute etzi Eibarren aurka, Zubietan. Kopari dagokionez, gaur egin dute final-laurdenetako zozketa eta arerio zailena tokatu zaie txuri-urdinei: Bartzelona. Partida bakarreko neurketa izanik, dena ematen saiatuko dira.
Saskibaloian, euskal derbia jokatuko dute etzi Ibaeta Basketek eta Araskik. Azken bi neurketak galdu ostean, Donostiako taldeak garaipenaren bidera itzuli nahiko du. Horretarako, Arabako taldea gainditu beharko dute. Sailkapenean nabarmen atzerago dauden arren, ez da neurketa erraza izango. LEB Oro ligari dagokionez, Gipuzkoa Basquetek Galiziako Basquet Coruña hartuko du etxean etzi.
PARTIDAK
Izotz hockeya
Emakumezkoen lehen mailako titulurako kanporaketa
- Bigarren partida: Txuri Urdin – Valdemoro (larunbata, 14:30)
- Hirugarren partida*: Txuri Urdin – Valdemoro (igandea, 14:30)
Gizonezkoen lehen maila, 2. jardunaldia eta 18. jardunaldia (atzeratuak)
- Bartzelona – Txuri Urdin (larunbata, 21:00)
- Milenio Panthers – Txuri Urdin (igandea, 14:25)
Belar hockeya
Emakumezkoen ohorezko maila, 10, jardunaldia
- Reala – Egara (igandea, 12:30)
Futbola
Gizonezkoen lehen maila, 27. jardunaldia
- Real Madril – Reala (larunbata, 21:00)
Emakumezkoen lehen maila, 23. jardunaldia
- Reala – Eibar (igandea, 12:00)
Saskibaloia
Emakumezkoen liga, 23. jardunaldia
- Araski – Ibaeta Basket (igandea, 12:00)
Gizonezkoen LEB Oro liga, 22. jardunaldia
- Gipuzkoa Basket – Basquet Coruña (igandea, 18:00)
