Bera Berak uztailaren 27an hasiko du denboraldiaurrea
Bera Berako jokalariak. (Argazkia: Bera Bera) 
Bera Berak uztailaren 27an, Josean Gasca kiroldegian, 10:00etan jarri du hitzordua denboraldiaurreari hasiera emateko, denboraldiari begira ondo prestatze aldera.
Estatu mailako tituluengatik borrokatzea eta European Leagueko multzoen fasean sartzea izango da Bera Beraren helburua denboraldi berrirako. “Era berean, kudeaketaren ikuspegitik, jokalarien profesionalizazioan beste urrats bat emango dute”, adierazi du taldeak.
Anne Erauskin, Giulana Shula Gavilan eta Paula Arcos dira denboraldiko jokalari berriak. Horrez gain, taldea sendotu dute Menendez, Arrojeria, Etxeberria, Sara Gil, Boada, Hernandez, Fernandes, Silva, Cavo eta Aalla, Loidi eta Poloniorekin. Imanol Alvarezek ere denboraldiaurrea osatzeko deituko ditu Haizea Urretabizkaia eta Oihane Bautista, aurreko denboraldian debuta egin zuten bigarren taldeko jokalariak, Amaia Zolezzi, Olaia Lizeaga, eta Eider Tapia, Bidasoatik etorritako pibotea, Espainiako jubenil selekzioarekin debuta egin duena.
Aurreko denboraldian bezala, jokalariek prestakuntza fisikoa Ammman egingo dute goizean, Miramongo Parke Teknologikoan dagoen zentro honekin hasi zen lanean Bera Bera duela urtebete. Arratsaldean, berriz, Gascan eta Bidebietan egingo dituzte saio tekniko-taktikoak. Alvarezek abuztuan zortzi lagunarteko jokatzeko asmoa du.
22-23 denboraldia irailaren 3ko asteburuan hasiko da Bera Bera eta Costa del Sol Malaga taldeen arteko partidarekin. Donostiarrek hasiera zorrotza dute Granollersen eta Elxen aurka Gascan. Liga titulurako play-off batekin eta jaitsiera saihesteko play-down batekin amaituko da, Superkopa abenduan jokatuko da, Bera Berak eta Costa del Sol Malagak Portugaleko Liga eta Kopako txapeldunen aurka jokatu dezakete. Bestetik, uztailaren 12rako European League-ri buruzko albisteak espero dira eta datorren astean ere Super Amara Bera Berak abonatu kanpaina ezagutaraziko du.
