Goia: "Hiriaren gaitzespen irmoena du ziztadak egitearen portaerak"
Eneko Goia alkatea, Tokiko Gobernu Batzordearen osteko prentsaurrekoan. (Argazkia: Beñat Parra) 
Azken egunotan Donostiako Aste Nagusiaren testuinguruan gertatutako ziztada bidezko erasoei buruz galdetuta, Eneko Goia alkateak erasotzaileak ohartarazi ditu astearte goizean Tokiko Gobernu Batzordearen ostean eskaini duen prentsaurrekoan: “Baten bat baldin badabil horrekin ‘jolasean’, esan behar zaio hiriaren gaitzespen irmoena duela portaera horrek, eta arrisku bat hartzen ari dela, ondorio penalak izan ditzakeelako. Ez da tontakeria bat”.
Hain zuzen ere, larunbat gauean Parte Zaharrean gertatutako lau ziztada kasu ikertzen ari dira Ertzaintza eta Udaltzaingoa, eta bart beste bat gertatu zen, Zurriolan. Alkateak azaldu du soilik horietako batean aurkeztu dela salaketa formala polizia etxean. Gainontzekoetan, biktimak jakinarazi zuen ziztada bat sentitu zuela, eta protokoloa aktibatu zen: artatzea, ziztada ote duen konprobatu, sustantziarik sartu dioten egiaztatzeko analisiak egin, eta abar. Horrela, “balantzea negatiboa da” Goiaren ustez, “kasu bakar bat gehiegizkoa delako”.
Azken egunotan, ordea, beste eraso matxista batzuk ere gertatu dira: larunbatean gizon bat atxilotu zuten emakume bati Bulebarrean ukituak egiteagatik, eta beste bat bere bikotekideari arma zuri batekin eraso egiteagatik. Bestalde, igande gauean adin txikiko gizon bat atxilotu zuten, adin txikiko beste gizon bati arma zuri batekin eraso egiteagatik. Bi eraso matxistak zein igande gaueko labankada deitoratu ditu Goiak, baina nabarmendu du “behintzat” atxiloketak izan zirela kasu guztietan: “Horrek esan nahi du segurtasun aldetik hartutako neurriekin erasoei erantzuna emateko gai garela”.
