Bera Berak jarraitzaileen babesarekin abiatuko du liga
Bera Bera taldeko Alba Menendez kapitaina iragan denboraldiko partida batean, Gaska kiroldegian. (Argazkia: Bera Bera) 
“Partida zaila da, baina interesgarria”, adierazi zuen atzo Imanol Alvarezek, Bera Berako entrenatzaileak. Gaur arratsaldean abiatuko du liga Bera Bera eskubaloi taldeak, eta aurrez aurre Malaga izango dute. Ez da arerio erraza izango, “talde hobea” dutelako. Horrela ere, ligako lehen partida Gaska kiroldegian jokatzeak beste hauspo bat emango die donostiarrei. Batez ere, jarraitzaileen babesa izango dutelako. Gaskan bertan, bi ordu lehenago puzgarri batzuk jarriko dituzte frontoi irekian, eta musika egingo da. Giro polita, beraz.
Futbolean, Realak Atletico Madril hartuko du bihar, Anoetan. Bartzelonaren kontra jasotako astinduaren ondoren, txuri-urdinek zaleei garaipen bat eskaini nahi izango diete. Gainera, baliteke Umar Sadiq aurrelari fitxatu berriak eta Alexander Sorlothek debuta egitea Realarekin, denboraldi honetan. Garaipena garrantzitsua litzateke goiko postuetan egonkortu ahal izateko. Une honetan, txuri-urdinak sailkapeneko zortzigarren tokian daude 6 punturekin.
PARTIDAK
Eskubaloia
Emakumezkoen ohorezko maila, 1. jardunaldia
- Bera Bera – Malaga (gaur, 18:15)
Futbola
Gizonezkoen lehen maila, 4. jardunaldia
- Reala – Atletico Madril (bihar, 18:30)
