Ametsa egia bihurtu da
Brais Mendez atzo sartutako gola ospatzen. (Argazkia: Reala) Realak garaipena lortu zuen bart Old Trafforden, Manchester Uniteden aurka (0-1). Europa Ligako lehen jardunaldian hiru puntuak lortu ditu talde txuri-urdinak, Brais Mendezek bihurtu zuen penalti baten bitartez. Imanol Alguacilek aldaketa batzuk egin zituen hamaikakoan, Atletico Madrilen aurkako neurketarekin alderatuta. Atzeko lerroan, Robin Le Normanden lesioa dela eta, Jon Pacheco nafarrak jokatu zuen, eta aurrean, Take Kubo eta Sadiq jarri zituen oriotarrak.
Partida hasieran Isabel II.aren heriotzarengatik minutu bateko isilunea egin zen. Epaileak neurketari hasiera eman zionean, talde txuri-urdina Alguacilek prentsaurrekoan eskatu zuen ausardiarekin irten zen zelaira. Baloiaren jabetza izan zuen lehenengo zatian, baina arrisku gutxirekin iritsi zen De Gearen atera. Manchester Unitedek berriz, aukera garbienak izan zituen, kontraerasoetan bereziki, baina ezin izan zuten Remiro garaitu. Aukera garbienetako asko Cristiano Ronaldok izan zituen, eta lehenengo zatian epaileak gol bat baliogabetu zuen portugaldarra jokoz kanpo zegoelako.
Bigarren zatian berriz, Alguacilek Sorloth Sadiquengatik aldatu zuen, eta taldea, berriz ere, ausardiarekin atera zen zelaira. Take Kubok arriskua zuten hainbat jokaldi egin zituen, baina Realak ez zuen gola lortzen. Horietako jokaldi batean, Silvak, area barruan, baloia jaurti zuen eta Lisandro Martinezen eskua ikutu zuen, epaileak penaltia pitatuz. Brais Mendezek bota zuen Oiartzabalen faltan, eta galiziarrak gola sartu zuen jaurtiketa gogor baten ondoren. Golaren ostean, Realak izan zituen minutu hoberenak eta talde ingelesak ez zituen aukera gehiegi izan. Sorlothek sortutako kontraeraso batean bigarren gola egiteko aukera izan zuten txuri-urdinek, baina ezin izan zuten jokaldia ondo bukatu.
Epaileak neurketaren amaiera adierazi zuenean, pozez agertu ziren Realeko jokalariak eta Alguacilek talde osoa zoriondu zuen. Ondoren, jokalariak milaka realzale zeuden harmailera hurbildu ziren haien babesa eskertzeko. Reala multzoko bigarren postuan dago, Sheriff Tiraspolek Omonia Nicosiari 0-3 irabazi baitzion.
