Marisol Garmendia eta Odon Elorza 2011n, Loiolako Erriberako pasabidearen inaugurazioan. (Argazkia: Xabier Etxabe) Odon Elorzak argitaratu berri duen iritzi artikuluan PSE-EEren jarrera kritikatu du, eta salatu du primarioak ez direla ez eredugarriak, ez eta inpartzialak izan. Lehendik ere esan zuen antzekorik, PSE-EEren egoitza aurrean, prentsa aurrean eginiko deklarazio batzuetan; orain, ordea, gaian sakondu nahi izan du.
Afiliatuen erroldarik ez zuelako, militantziaren abalak jasotzea kostatu zitzaiola aitortu zuen Elorzak: “Urriaren 9ko azken bozketara iritsi nintzen eta galdu egin nuen. Ez naiz damutzen eta ez naiz lotsatzen. Bozketaren emaitza argia izan zen, aparatuaren babes publikoa izan zuen hautagai ofizialaren alde”.
“Apaltasunez” onartzen ditu Elorzak emaitzak: “Baina ez litzateke zintzoa izango Gipuzkoako buruzagi sozialistek egindako adierazpenak ontzat emango balitu; izan ere, Primarioak eredugarriak dira eta alderdiaren zuzendaritzaren inpartzialtasun-printzipioa errespetatzen dute. Ez da horrela izan. Botoa orientatzeko eta mediatizatzeko ekintza estrategia bat ikusi dut, Estatutuetan aurreikusitakoaren aurka; estrategia horrek aukera-berdintasuna, askatasuna, gardentasuna eta erakundearen zuzendaritzaren inpartzialtasuna eskatzen ditu prozesuan zehar”.
Gauzak horrela, PSE-EEren berme batzordean helegitea jarri duela jakinarazi du: “Badakit soka mehe-mehe baten gainean nabilela, eta, aurrekoa baieztatzearren, izango direla galtzen ez dakidala edo gezurretan ari naizela diotenak. Ez zait axola. Euskadiko Etika eta Hauteskunde Bermeen Batzordera bidali dudan idazkian, Primarioen Erregelamendua hobetzera eraman behar gaituzten gertakari ez eredugarriei buruzko alegazioak jaso dira. Emaitza ikusiko dugu”.
