Donostia Ospitaleko egoera "jasanezinaren" aurrean, alkateak zer egingo duen argitzeko eskatu du Elkarrekin Donostiak
Elkarrekin Donostiaren ustez, "beharrezkoa eta premiazkoa da" udal gobernuak azaltzea zer urrats eman asmo dituen Donostialdeko ESIan jazotako "gertakari larriak" konpontzeko.
Osakidetzako Donostialdeko ESIko zerbitzuburu batzuen elkarretaratzea, Donostia ospitalearen aurrean. 
Elkarrekin Donostiak premiazko interpelazioa aurkeztu du Eneko Goia alkateak Donostialdeko ESIaren krisi larria konpontzen laguntzeko Udalak hartuko dituen neurriak argitu ditzan, donostiarren osasun zerbitzuetan eragin zuzena duelakoan. Horregatik, Osakidetzak eta Osasun Sailak Donostiako ospitale guneari buruz hartu dituzten azken erabakien ondorioz, egoera kezkagarri hori desblokeatzen saiatzeko Donostiako Udalak emango dituen pausoei buruzko azalpenak emateko eskatu dute.
Aitzole Araneta udal alderdiko bozeramaileak zalantzan jarri du zergatik ez den bildu udal gobernua kargugabetzeak gertatu zirenetik mobilizatzen ari diren zerbitzuburuen taldearekin. Alkateak prentsan adierazi du kezkatuta dagoela Donostia Ospitaleak erreferente izateari utz diezaiokeelako, eta elkarrizketarako bideak irekitzearen alde dagoela: “Zeintzuk dira, hiri honetako arduradun publiko gorena denez, bultzatu nahi dituen bide horiek? Hiri honetako zerbitzu medikoen kalitateari hain zuzenean eragiten dion egoera hau konpontzen saiatzeko hurbilketa motaren bat hasi al du?”, galdetu du Elkarrekin Donostiak.
Koalizioaren ustez, Donostia Ospitalea gaur egun dagoen krisiari, “lehen mailako arretaren egoera larri kezkagarria” gehitu behar zaio: “Gure hiriko zentro medikoetan ordutegiak murriztuta daude. Egoera jasanezina da, eta neurri egokiak hartu behar dira Donostiako osasun-zerbitzuen kalitatea hobetzeko”.
