Hilabete Lukas Agirre gaztearen erailketatik
Usandizaga ikastetxeko ikaskide ohiek Lukas Agirreri omenaldia egin zioten.Xalba Ramirez 
Lukas Agirre Izko gazte hernaniarraren omenez, elkarretaratze isila egin dute Usandizaga institutuan, haren erailketatik hilabete pasa denean. Elkarretaratzean Usandizagako ikasle eta ikasle ohiez gain, haren senideak izan dira, eta oroigarri bat eman diote Agirreren amari.
Lau urte eman zituen Agirrek Usandizaga ikastetxean, 2014 eta 2018 bitartean. Lehenik, Arte Batxilergoa egin zuen, eta jarraian, Usandizagan ere, Publizitate Grafikoaren Goi Mailako Heziketa Zikloa.
Ikastetxeak zabaldu zuen oharrean “indarkeria zentzugabea” gaitzetsi dute, eta gertakaria “sinestezina, ulertezina eta onartezina” dela azaldu dute: “Oraindik ere bere artelanak ikastetxeko hormetan zintzilik daudela, bere izaera lasaia, saiatua eta irribarre goxoak hutsune bete ezina uzten digu”.
Mezu honekin amaitu dute oharra: “Lukas Agirre Izko, gure artean geratuko da betiko, noizbait amestutako bidea ikasle askorentzat eredu ezin hobea izango da etorkizunean”.
