Hirugarren euskal derbia ere irabazi nahi dute
Realeko neskek sasoiko hirugarren euskal derbia jokatuko dute bihar, 12:00etan.
Realaren eta Alavesen arteko lehen itzuliko partidako une bat. (Argazkia: Reala) 
Emakumezkoen ligako lehen itzulian Alavesi (1-5) eta Athletici (1-3) irabazi ostean, bigarrenez jokatuko dute talde arabarraren kontra. Dena dela, ez da orduko talde bera, hobera egin dutelako. Horregatik, txuri-urdinek partida borobila egin beharko dute hiru puntuak lortzeko. Betisen kontra berdindu izana ez zen nahikoa izan, eta garaipenaren bidera itzultzeko aukera baliatu nahi dute.
Europa ligatik kanpo geratu ondoren, Realeko mutilek liga baino ez dute jokoan. Hain zuzen ere, Europan berriz ere jokatzeko erronka dute aurretik. Horretarako, azken emaitzen dinamika atzean utzi behar dute, eta horretarako garaipenak baino ez du balio. Elx hartuko dute igandean, Anoetan (16:15). Ezin esan hil ala biziko partida denik, baina oso garrantzitsua izango da. Irabazteak arnasa emango lioke jokoz, erritmoz eta emaitzez justu dabilen taldeari.
Belar hockeyan, Realeko emakumezkoek Taburiente liderraren aurka jokatuko dute igandean, Bera Berako zelaian (10:30). Etenaren osteko itzulera ez zen onena izan txuri-urdinentzat, Terrassaren kontra galdu zutelako. Beraz, etxeko lanak bete beharko dituzte pasa den jardunaldiko sentsazio txarra kentzeko. Gainera, datorren asteko asteburuan jokatuko den kopari begira, emaitza on bat lortzen ahaleginduko dira.
Izotz hockeyan, berriz, Txuri Urdinek kopako final-laurdenei ekingo die bihar, 21:00etan. Majadahonda talde madrildarra hartuko dute Anoetako izotz jauregian. Ligan lehia gogorrak izan dituzte euren kontra, eta, beraz, ez dute erraz gaindituko arerioa. Horrek ez du esan nahi posible ez denik. Ligan erakutsitako mailarik onena eman beharko dute.
Saskibaloian, Ibaeta Basketek azken porrotari aurre egiteko aukera izango du Gaska kiroldegian, bihar, 18:00etan. Denboraldi irregularra bukatzeko partida gutxi geratzen zaizkie, eta zulotik aldentzeko Leganes gainditu beharko dute.
PARTIDAK
Futbola
Emakumezkoen liga, 22. jardunaldia
- Reala – Alaves (igandea, 12:00)
Gizonezkoen liga, 25. jardunaldia
- Reala – Elx (igandea, 16:15)
Belar hockeya
Emakumezkoen ohorezko maila, 13. jardunaldia
- Reala – Taburiente (igandea, 10:30)
Izotz hockeya
Gizonezkoen kopako final-laurdenak, lehen jardunaldia
- Txuri Urdin – Majadahonda (larunbata, 21:00)
Saskibaloia
Emakumezkoen liga, 26. jardunaldia
- Ibaeta Basket – Leganes (larunbata, 18:00)
