San Bartolomeko merkataritza zentroa gelditzeko auzitara jo dute Erdialdeko auzokideek eta merkatariek
"Auzitara jotzeko eskubide osoa dute, eta udalak bere defentsa egingo du", adierazi du Eneko Goia alkateak.
San Bartolome Hirigintza Esparruko Plan Bereziaren simulazioa. 
Dendartean merkatarien elkarteak, Erdian Bizi eta Amara Bai auzo elkarteek eta Donostia Defendatuz koordinakundeak indarrak batu dituzte San Bartolome Hirigintza Esparruko Plan Berezia gelditzeko. Zehazki, EAEko Justizia Auzitegi Gorenera jo dute proiektuak aurreikusten duen merkataritza zentroa da eten nahi dutena. Helegitearen xehetasunak aurkezteko prentsaurrekoa egingo dute bihar, baina hedabide batek gaur aurreratu ditu.
Eneko Goia alkateak aurkezturiko helegitea “errespetatzen” duela adierazi du Tokiko Gobernu Batzordearen osteko prentsaurrekoan. “Auzitara jotzeko eskubide osoa dute, eta udalak bere defentsa egingo du. Izan ere, ziur nago udalak egiten dituen espedienteak legalak direla”, esan du Goiak. Horrez gain, “gogorarazi” nahi izan merkataritza zentroa San Bartolomeko Plan Bereziaren “azken piezetako bat” dela, goialdean egitea aurreikusten den parkearekin batera. “San Bartolomeko hegala ezin da horrela geratu, eta beharrezkoa da Plan Bereziarekin aurrera egitea”, nabarmendu du.
Plan Bereziaren onarpena
Donostiako Udalbatzak urteko lehen osoko bilkuran onartu zuen San Bartolome Hirigintza Esparruko Plan Berezia. EAJk eta PSE-EEk babestu zuten, eta EH Bilduk, Elkarrekin Donostiak eta PPk kontra bozkatu zuten. Onarturikoaren arabera, 8.000 metro koadroko eta bost solairuko merkataritza zentro bat jarriko dute San Bartolomeko muinoaren barnealdean. Gainera, lurpeko aparkaleku bat eraikiko dute; lau solairukoa eta 270 plazakoa.
