Giro aparta Piraten kuadrillen jolasetan
Askotarikoak izan dira kuadrillen jolasetako probak. (Argazkia: Beñat Parra) 
Eskifaia kofradiak antolatuta, gazte kuadrilla ugari elkartu dira astearte arratsaldean Zuloaga plazan, kuadrillen jolasetan lehiatzeko. Urtero gai desberdin bat aukeratzen dute Eskifaiakoek kuadrillak mozorrotzeko; iaz, esaterako, telebista saioak izan ziren gaia, eta aurten kirolak izan dira. Hau da, kuadrilla bakoitza kirol batez zihoan mozorrotuta, eta denetarik egon da: golf jokalari xelebre eta tranpatiak, dantzariak, surflariak, harri jasotzaileak (hori izan da mozorrorik onena) eta bihurrikeritan ibili diren txirrindulariak, besteak beste.
Talde asko zirenez, batzuek jolasak egiten zituzten bitartean besteek prendak egin behar izan dituzte Parte Zaharreko kaleetatik. Askotariko jolasak egin dituzte, gehienetan Sex on Eskifaia edari misteriotsua tartean egon delarik; agian horregatik egiten zuten horrenbeste barre parte hartzaileek eta epaileek?
Azkenean, hainbat sari banatu dituzte Eskifaiakoek, denak kaiko txosnetan trukatzekoak, alajaina. Amaieran, talde argazkia egin eta kalejiran abiatu dira kairantz, denak batera eta jai giro ederrean.
Jarraian, kuadrillen jolasetako bideoa eta irudi bilduma:
