Ibaetako campusean Ikasle Gela bat lortzeko kanpaldia egingo dute
Ibaetako campuseko Hezkuntza fakultatea. 
EHUko Ibaetako campuseko Dardara ikasle plataformak kanpaldi bat antolatu du hilaren 27tik 28ra, campusean Ikasle Gela bat behar dutela aldarrikatzeko. “Animatu proiektuak ezagutzera, unibertsitatea kolektiboki okupatzera eta ikasleon autogestioaren aldeko aldarriak lau haizetara zabaltzera”, nabarmendu dute.
Hilaren 27an bertan egun osoko egitaraua izango dute campuseko Oñati plazan, gosari, bazkari, erakusketa, kontzertu, afari eta guzti. Gaua han pasatuko dute, eta 28an ere elkarrekin gosalduko dute, kirola egiteko aukera izango dute, elkarrekin bazkalduko dute eta asanblada batekin emango diote amaiera egitasmoari.
Dardarak ikasturte hasieratik darama Ikasle Gela bat aldarrikatzen. Azaldu dutenez, “ikasleei eskaintza sozial, kultural eta politikoa emateko espazio bat da” Ikasle Gela. “Ikasleon indibidualizazioari aurre egiteko espazioa da, eta hainbat proiektu garatzeko aukerak ematen ditu (bertso eskola bat, eztabaida talde bat antzerki talde bat, eta abar)”, gaineratu dute.
