Manteoko lanak eteteko bigarren galdeketa egingo dute
'Lanak gelditu eta Manteoko parkea berreraikitzea nahi duzu?', galderari erantzun behar diote herritarrek.
![Manteo_protesta](https://irutxulo.hitza.eus/site/files/2024/04/manteo_protesta.jpg)
Gaur eta bihar, Uliako Auzo Elkarteak bigarren herri galdeketa egingo du Manteoko Basque Culinary Centerren egoitzaren lanak gelditzeko. Botoa Internet bidez eman daiteke dagoeneko —biharko 20:00ak arte—, eta presentzialki bozkatzeko aukera prestatu dute. Zehazki, hauteslekua Groseko hiru tokitan jarriko dute herritarren iritzia jasotzeko: Katalunia plaza, Nafarroa Beherea plaza eta Okendo Kultur Etxea. 16:00etatik 20:00etara egongo dira hiru leku horietan.
Abenduaren 30ean egin zuten lehenengo galdeketa, eta ia 7.000 lagunek parte hartu zuten —6.948k, zehazki—. 6.486 pertsonak (%96,53), BCCren bigarren egoitzaren aurrean, parkeak babestearen aldeko botoa eman zuten. 222k (%3,30) bozkatu zuten parkeak ez babestearen aurka, 11 lagunek boto zuria eman zuten (%0,16) eta 229 boto baliogabeak izan ziren.
Parkearen aldeko martxa
Manteoko parkea berreskuratzeko martxa egin zuten atzo arratsaldean, Groseko kaleetan barrena. Hainbat lagunek parte hartu zuten protestan.