Kaleratzeak Stop taldeak helegitea aurkeztu du 'Izadi Enea' eta Illarrako etxebizitza proiektuen aurka
Eneko Goia alkatea oso haserre agertu da errekurtsoekin, eta Rosa Garcia bozeramailearen "kontraesanak" salatu ditu.
Amenabar enpresak 252 etxebizitza eraikiko ditu 'El Diario Vasco'-rena zen lursailean.Amenabar 
Donostiako Udalak duela egun batzuk jasotako helegite baten berri eman du Eneko Goia alkateak, Tokiko Gobernu Batzordearen osteko prentsa agerraldian. Hain zuzen ere, Ibaetako Izadi Enea —El Diario Vasco-ren lursaila— eta Illarrako etxebizitza proiektuen aurkakoa da helegitea.
Goiak berak aurreratu du Rosa Garciak, Kaleratzeak Stop taldeko bozeramaileak, aurkeztu duela, eta helegitea bera “oso larria” iruditzen zaiola adierazi du: “[Rosa Garcia] Etengabe ari da salatzen hirian etxebizitzak falta direla, eta udalak egoera horri aurre egiterakoan, kontra egiteak ez du zentzurik, baldin eta estrategia maltzur baten parte ez bada. Hau da, denari ezetz esatearen estrategia”.
Nekane Arzallus Hirigintza zinegotziarekin batera, aipaturiko bi eremuetan egingo diren etxebizitzak nabarmendu ditu alkateak. Ibaetako Izadi Enea hirigintza proiektuak 252 etxebizitza aurreikusten ditu, horietatik %40 babes ofizialekoak. Illarra eremuan, berriz, 262 etxebizitza eraikiko ditu udalak, eta horietatik 131 izango dira babes publikokoak. Orotara, udalak 18 milioi euroko inbertsioa egingo duela esan du Goiak.
Helegitearen arrazoiak
DonostiTik hedabide digitalak Garciarekin hitz egiteko aukera izan du, eta helegitearen arrazoiak azaldu ditu. Kaleratzeak Stop-eko bozeramailearen ustez, babes ofizialeko etxebizitzen portzentaia “gutxienekoa” da eta “handiagoa” izan beharko luke. Horrekin batera, etxebizitza proiektu berriak “alokairura” bideratzea eskatu du.
Bi eremuetako etxebizitza proiektuek aurrera egingo dutela uste du udalak, eta horregatik auzitara jotzea erabaki dute. Dena dela, Goiak eta Arzallusek aitortu dute epaile batek proiektuak behin-behinean bertan behera utz ditzakeela. Horrela ere, Hirigintza zinegotziak adierazi du, ondo bidean, urtea bukatu baino lehen lanekin hasiko direla bi eremuetan.
