Hainbat auzotako erraldoiak elkartuko dira Larratxon
Atzera kontaketan murgilduta daude Larratxon, ostegunean lehertuko baitira auzoko jaiak. Hainbat berritasunekin datoz aurten, tartean Erraldoien Topaketa eta Bingo Musikatua.
Naiara Crujeiras, jai batzordeko beste kide batzuekin.Beñat Parra 
Donostiako udako lehenengo jaietarikoak dira Larratxokoak, eta, horregatik, jendea «gogo handiz» egon ohi dela nabarmendu du Larratxoko jai batzordeko kide Naiara Crujeirasek. Dioenez, aurten ere horrela ikusten du auzoa: «Larunbatero, futbol txapelketako partidak jokatzen ari gara, eta jendea atzera kontaketarekin dabil astero: ‘hiru aste gelditzen dira!’, ‘bi aste gelditzen dira!’, eta horrela».
Lasai egon daitezke Larratxokoak, astebete baino gutxiago gelditzen baita txupinazoa bota eta festa lehertzeko, eta jai batzordeak egitarau zabala prestatu baitu aurten ere, adin guztietako auzotarrek jaiez goza dezaten. «Gu nekatuta iritsi ohi gara jaietara lan guztiarengatik, baina jaiek aurrera egin ahala, pasatzen zaigu nekea eta guk ere gozatzen dugu», dio, barre artean, Crujeirasek. Hemen daukazue jaietako egitarau osoa.
Nahi adina berritasun
Jarduera ugari izan ohi ditu Larratxoko jaietako bost eguneko egitarauak, baina urtero baten bat gehiago sartzeko tartea aurkitzen dute jai batzordekoek: «Hainbat berritasun ditugu aurten: Erraldoien Topaketa, Bingo Musikatua, osteguneko kontzertua, ur zezenak eta Asgicer elkartearen postua eta zumba erakustaldia, hain zuzen ere», azaldu du Crujeirasek.
Osteguneko kontzertua patioan izango da, eta Zarratak talde gazteak joko du, auzoa punk eta metal erritmora mugitzeko. Bestalde, ur zezenak estreinakoz izango dituzte Larratxon, eta Asuncion ikastetxekoek proposatuta antolatu dute Bingo Musikatua astelehenerako. Horrela, Crujeirasen hitzetan, astelehenean barrakak merkeago jartzeaz gain, jarduera bat bere horretan ere izango dute jaiek.
Minbiziaren aurkako Asgicer elkarteak jaietan parte hartuko du aurten: postua jarriko du patioan, eta zumba erakustaldia antolatu du
Hala ere, Erraldoien Topaketan jarri dituzte jarrita espektatiba gehien, batzordekidearen arabera: «Herrerako, Loiolako, Groseko eta Parte Zaharreko erraldoiak etorriko zaizkigu bisitan, eta gureekin batera ibiliko dira auzoan. Beste toki batzuetan ere egiten dute, eta oso polita iruditzen zaigunez, bizilagun batek proposatu zigunean, animatu ginen gu ere antolatzera. Uste dugu arrakasta handia izango duela egitasmoak!».
Bestalde, berritasun berezi gisa, minbiziaren aurkako Asgicer elkarteak jaietan parte hartuko du aurten: larunbatean, postua jarriko du eskolako patioan, eta zumba erakustaldia antolatu du.
Betikoak ez dira faltatuko
Bertutea erdiko puntuan dagoela dio esamolde ezagun batek, eta berritasunen eta jarduera tradizionalen arteko ohitura ondo baino hobeto mantentzen dakite Larratxon. Izan ere, berritasunetatik harago, urtero arrakasta handia duten jarduerak ere antolatu dituzte aurten, Crujeirasek barrez dioenez, nahiko balute ere, ezingo lituzketelako egitarautik kendu: «Txupinazoko holi festa, paella lehiaketa eta zikiroa, esaterako, tradizio bihurtu dira dagoeneko». Halaber, iaz estreinakoz antolatutako Rap Lehiaketak gazteen artean «arrakasta handia» duela nabarmendu du.
Egitarau zabala eta lan handiz landutakoa prestatu dute Larratxoko jaietarako, eta gauza bakarra baino ez du eskatu Crujeirasek hurrengo asteburura begira, Donostiako jai batzorde guztiek eskatu ohi dutena: «Ea eguraldi ona egiten duen!».
