Mintza Lagun zikloak museoak izango ditu hizpide gaurko saioan
Santa Teresa komentua. (Argazkia: Agurtzane Altuna) 
Mintza Lagun elkarrizketa zikloak saio berri bat eskainiko du gaur Koldo Mitxelena kulturuneko behin-behineko egoitzan, Santa Teresa Komentuan, Museoa pentsatu: artea eta gizartea izenburupean.
Gipuzkoako Foru Aldundiko Kultura Sailak antolatutako zikloaren saio berri honetan, arratsaldeko zazpietatik aurrera, Manuel Borja-Villel historialari eta komisarioak eta Angela Molina arte kritikariak parte hartuko dute, Gonzalo Torne moderatzailearekin batera.
Goizane Alvarez Gipuzkoako Kultura, Lankidetza, Gazteria eta Kiroletako diputatuak prentsa ohar batean adierazi duenez, jardunaldi honek “museoen zeregina zein den aztertu eta eztabaidatu nahi du”, gune horiek “ondarearen babesaren eta sentsibilitate garaikideei heltzeko beharraren arteko bidegurutzean dauden une honetan, eta saio honetan galdera erabakigarriak jorratuko dira”.
Alvarezen ustez, “hitzaldi honen garrantzia da ulertu behar dela museoak ez direla artearen eta objektu historikoen biltegi hutsak, etengabe eraldatzen ari diren lekuak direla, eta espazio bizi bihurtu behar dutela, eta horien jarduera hausnarketa eta elkarrizketa elikatzen dituen topaketa ere izan behar dela”.
Mintza Lagun zikloak, halaber, “ziurgabetasun, erronka eta erronkek markatutako testuinguru kezkagarri bati erantzutea du helburu, eta, bestetik, herritarrei ezagutzan, hausnarketa kritikoan eta eztabaidan sakontzeko baliabideak eta espazioak ematea”.<
