Beñat Sarasolak 'Coca-Cola bat zurekin' nobela argitaratuko du irailean
Beñat Sarasola idazle donostiarra. 
“Azken boladan honekin ibili naiz atzera eta aurrera. Jadanik amildegiaren ertzera ailegatu gara, eta beraz, ez da atzera bueltarik”. Hitz horiekin iragarri du nobela berria Beñat Sarasola idazle donostiarrak. Coca-Cola bat zurekin izango da bere izenburua, eta irailean kaleratuko du Susa argitaletxearekin.
Joaquin Gañezek egindako azala aurreratu du, eta baita nobelaren atzealdean irakurri ahal izango den testua:
“Frank O’Hara poetak zuzendutako lehen erakusketaren inaugurazio eguna New Yorken. 1960ko uda. Espainiako pintura eta eskultura berriaren lagin on bat biltzea da ideia, eta hautagaien artean daude nazioartean sona hartzen ari diren Oteiza eta Chillida izeneko artista bi ere. Artea erregimen frankista zuritzeko baliatu ez dadin adi daude, bestalde, beste zenbait. Eta, bitartean, O’Harak, lanak lan, Vincent Warren dantzari eta maitalearengan du jarrita bere gogo biziena.
New York, Madril, Irun, Montevideo, Donostia, Miarritze. John Ashbery, Grace Hartigan, Luis Gonzalez-Robles, Antoni Tapies, Diane di Prima, Ramos ahizpak. Iragan mendearen erdialdea igaro berritan, AEBetako eta Europako kultur mundua astindu zuten dozenaka izen sartu-irtenean dabiltza kontakizun honetan, argiaren —hala itsasertzeko egun batena, nola etxe-orratzen bitarteetakoa—, minduraren eta begirada ironiko bezain alai baten artetik. O’Hararen poemetan gertatzen den bezalatsu, hain justu. Haietako bati zor dio izena Beñat Sarasolaren bigarren nobelak”.
‘Coca-Cola bat zurekin’ nobelaren azala.Joaquin Gañez
