«Herritarren partetik, orain arteko harrera beroena jaso dugu»
Donostia Arraun Lagunak da historian lehen aldiz den-dena irabazi duen trainerua. Ligako estropada eta bandera guztiak eskuratuta, Kontxako bosgarren bandera astindu berri dute. Era berean, bost dira lorpen horiek konpartitu dituzten arraunlariak: Ane Sanchez (Anoeta, 1998), Aiora Belartieta (Lasarte-Oria, 2002), Lorea Etxabe (Pasai Donibane, 2000), Mar Larrea (Ondarroa, 1994) eta Xubane Uribarrena (Donostia, 1999).
Donostia Arraun Lagunak-eko txapeldunak, Kontxako bosgarren banderarekin.Joseba Parron San Sebastian 
Kontxako bost bandera dituzue. Dagoeneko kontziente zarete lorturikoaz?
Ane Sanchez (A.S.): Egia esan, ez. Denboraldi bakoitza hasten denean, Kontxa irabaztea helburuetako bat da, baina ez dugu presente izaten iristen den arte. Orain, sasoia bukatu dela, gelditu eta atzera begira jartzean konturatuko gara lorturiko guztiaz.
Lorea Etxabe (L.E.): Nik uste dut oraindik goiz dela. Denbora beharko dugu kontziente izateko, eta, agian, urteak beharko ditugu horretarako.
Mar Larrea (M.L.): Bai, nik ere uste dut oraindik ez garela kontziente lorturikoaz. Batez ere, elkarrekin lortu dugun maila ikaragarria da. Ados nago Lorearekin, urteak beharko ditugulako hau dena asimilatzeko.
Xubane Uribarrena (X.U.): Ados nago esandakoarekin. Niri maila berean jarraitzea gustatuko litzaidake, irabazteko aukera horiek mantentzeko datozen denboraldietan. Halere, irabaztearen ohitura galtzean konturatzen zara asko kostatzen dela, zenbat lan egin behar izan dugun gauden tokira eta momentura iristeko. Orduan konturatuko gara benetan lortu dugunaz, eta behar duen balioa emango diogu.
Aiora Belartieta (A.B.): Horrela da, egindakoaz kontziente izateko denbora pasatu behar da. Sekulako denboraldia egin dugu, baina aurrekoak ere oso onak izan dira.
Bat irabaztea ikaragarria izan zen guztientzat. Beraz, bost?
X.U.: Bost… Ez dakit, ikaragarria da. Arraunlari askok amesten dute Kontxako Bandera behin irabaztearekin, edo gutxienez, Kontxa batean parte hartzearekin. Irabaztea beste jauzi esanguratsu bat da, baina nork esango zigun bost lortuko genituela! Nire buruan kokatu ditut lorturiko bost banderak, eta sekulakoa iruditzen zait.
L.E.: Nire kasuan, txikitatik, San Juanen Batelerak txalotu ditut Donostiako arrapalan, eta orain ni naiz jendeak txalotzen duen horietako bat. Ilusio berezia egiten dit nire erreferenteen mailara iritsi izanak.
A.S.: Hasieran, arraunlarion ametsa izaten da Kontxako sailkapen estropada jokatzea eta gero sailkatzea. Irabaztea, ordea, beste maila batean dago. Arraunlari on asko daude Kontxa sekula irabaziko ez dutenak. Guk zortea izan dugu osatu dugun taldearekin, eta horri esker lortu ditugu bost banderak.
M.L.: Ondarroan, txikitatik bizi ahal izan dut arrauna. Aitari esan nion gustuko nuela, eta haren babesa jaso nuen kirol honetan murgiltzeko. Duela zortzi urte hasi nintzen Donostia Arraun Lagunak-ekin arraunean, eta bederatzi denboraldi osatu ditut. Juan Mari Etxabe iritsi zenean, zeharo aldatu zuen taldearen dinamika. Orduan sinetsi genuen lehiakorrak izango ginela, irabazteko gosea transmititu zigulako.
A.B.: Arraunean hasi nintzenean, ikusten nuen beste taldeek Kontxako Banderak irabazten zituztela, eta nik neure burua ez nuen hor ikusten. Lehena irabaztea ikaragarria izan zen, eta orain bosgarrena lortu dugu.
Bost horietatik, zein da zuentzat bereziena edo garrantzitsuena?
M.L.: Bueno, niretzat denak dira bereziak. Halere, bostak hartuta, niretzat aurtengoa izan da bereziena.
X.U.: Denek dute balio propioa, baina ospatzen azkena izan delako, bosgarrena hautatuko nuke. Inoiz baino jende gehiago sentitu nuen inguruan. Arrauneko kamiseta asko ikusi nituen, eta pentsatu nuen lortzen ari garenak gero eta zale gehiago erakarri dituela. Herritarren partetik, orain arteko harrera beroena jaso dugu.
L.E.: Nire ustez, urteekin asko aldatzen ari da Donostian arrauna bizitzeko modua. Pasa den igandean, kamiseta asko saldu zirela esan digute, eta egia da gero eta gehiago ikusten direla. Ederra da hori. Gauzak ondo egiten ari gara, eta jendeak ere badaki. Herritarren partetik jaso genuen babesa ikaragarria izan zen.
A.S.: Nik esango nuke bakoitzaren momentu pertsonalak eragin handia duela irabazitako banderekin. Urte guztiak desberdinak izan dira, eta bakoitza egoera desberdin batean bizi ahal izan dugu. Kontxa estropada oso emozionala da, eta niretzat bosgarrena da bereziena.
A.B.: Irabazitako guztietan zerbait gertatu da, eta nik 2023koa dut gogoan. Lau traineru lau segundotan iritsi ginen bigarren igandera. Aste horretan oso gaizki pasatu nuen, urduritasunagatik. Azkenik, ordea, irabaztea lortu genuen. Ikaragarria izan zen lehiatuena izan zen Kontxa hori eskuratzea. 2024koa ere gogoan daukat, aste horietan nire amona hil zelako, eta berezia izan zen niretzako.
Aurtengo Kontxari dagokionez, hitz gutxitan zein balorazio egiten duzue bi jardunaldiena eta Plaza Berrian jaso zenuten merezitako harrerarena?
A.S.: Kirol mailari dagokionez, lehen igandean ez genuen gure bertsiorik onena eman, eta ez ginen sentsazio onarekin geratu. Horrela ere, emaitza oso ona lortu genuen. Asko exijitzen diogu geure buruari, eta bigarren igandean estropada askoz hobea jokatu nahi genuen. Zorionez, horrela izan zen. Gure arraunketa berreskuratu genuen, tentsio handiko astea pasatu eta gainditu ostean. Azkenean, zapore oso gozoarekin geratu gara, emaitza ona ez ezik, arraunean nahi genuen moduan ere aritu ginelako. Harreraren kasuan, izugarria izan zen; Plaza Berria duela lau urte ez zegoen horrela!
A.B.: Aurten ere, gure maila erakutsi dugu, baina, bai, lehen igandean ez ginen gustura geratu. Ligako azken estropadetan gertatu moduan, ez genituen sentsaziorik onenak. Bigarren jardunaldian, ordea, gure arraun egiteko maila onena berreskuratu genuen, lasaitasunez eta luze-luze. Irteeratik bukaerara arte sufrituz gozatu genuen estropada izan zen. Gero jaso genuen harrera izugarria izan zen. Urte batetik bestera, gero eta jende gehiago etortzen da, plaza beteta zegoen, eta, egia esan, izugarria da plaza handi hori beteta ikustea. Oso polita izan zen.
X.U.: Anek esan duen moduan, aitortu behar dugu azken hiru astetan ez ginela arraunean gozatzen ari. Bagenekien zetorrena garrantzitsua zela, eta horrek tentsioa areagotu zuen. Ez ginen asmatzen ari, eta, beraz, ezinbestekoa zen bigarren igandean estropada txukun bat egitea. Batez ere, denboraldi bikaina borobiltzeko.
San Juan eta Galizia taldeek lorturikoa berdindu duzue. Seigarrenaren bila joango zarete datorren urtean?
A.B.: Egia da bi traineru horien parean jarri garela, eta seigarrena lortzeko, lehenik, orain arte lorturikoa barneratu behar dugu. Taldeko joan-etorriek ere baldintzatu dezakete hori, beraz, argitzean ikusiko dugu zein helburu jarriko diogun datorren sasoiari.
L.E.: Bai, noski, azkenean, taldea oraindik oso gaztea da; batez besteko adina ez da 27 urtera iristen. Jendea gogotsu ikusten dut eta maila handia ematen ari gara. Egia da ere urte guztiak ez direla berdinak, aldaketak egoten direlako, baina nik ikusten dut etorkizuneko proiektu indartsu bat dagoela.
Mar Larrea, Xubane Uribarrena, Ane Sanchez eta Lorea Etxabe —ezkerretik eskuinera—, Donostiako kaian. Aiora Belartietak ezin izan zuen bertaratu.Joseba Parron San Sebastian
Denboraldia borobildu duzue den-dena irabazita; estropada eta bandera guztiak. Donostia Arraun Lagunak da historian hori lortu duen lehen kluba. Harro egoteko modukoa da, ezta?
A.B.: Oso harro gaude, bai. Izugarria da estropada eta bandera guztiak irabaztea, nahiz eta gure helburua ez izan. Hitzik gabe geratzen naiz, oso zaila delako lortu dugun guztia. Are gehiago, arraunaren moduko kirol batean.
X.U.: Bai, eta maiz esan dudan moduan, oso-oso zaila da lortzea. 2024an denboraldi oso ona egin genuen, dena irabazi genuelako, estropada bat izan ezik. Sasoi hura errepikatzea oso zaila zen, baina begira, errepikatu eta gainditu dugu. Bi urte geroago, lortu dugu maila are hobea emanda. Horregatik diogu oraindik ez dugula asimilatu, arrauna ziztu bizian doalako. Denbora asko pasatzen dugu entrenatzen, eta behin lehia hasita, asteburu asko pilatzen ditugu arraunean. Beraz, ez dugu denbora izaten benetan bidean lorturikoa baloratzeko.
A.S.: Egia da ere, beste taldeek estutzen ez zaituztenean, oso zaila dela zure maila onena ematea eta mantentzea oso zaila dela. Aurten gertatu zaigu, eta ez dut esango estropada batzuk erraz irabazi ditugunik, baina bai horietako asko besteekiko alde nabarmenarekin. Horrek eragiten duena da, estropada batean zeure burua ez exijitzea gehiago, atzetik duzuna dagoeneko zortzi segundora badoa. Gehiago eman dezakegu, noski, baina beharrezkoa ez bada, ez estutzea izaten da joera normalena. Beraz, traineruen maila parekatuagoa izango balitz, liga interesgarriagoa izango litzateke. Aurten, Arraunek momentu askotan ez du jakin errematatzen, eta ez dugu dugun benetako maila erakutsi.
L.E.: Izan ere, talde honek beti uste du hobetzeko gauzak dituela. Kontxako lehen jardunaldian hamar segundoko abantaila lortu arren, oraindik kexaka ari ginen [barrez]!
Gehiago ezin da irabazi, baina bai gehiagotan. Hori da nahi duzuena?
A.S.: Urte asko daramatzagu elkarrekin. Ziklo arrakastatsua duela zazpi urte hasi genuen, pentsa. Hasiera hartatik, soilik bostek jarraitzea lortu dugu. Aldaketa asko izan ditugun arren, Arraunek hobera egin du, eta aurreikusten diren hurrengo aldaketekin ikusteko dago maila bera mantenduko dugun.
M.L.: Inor ez da ezinbestekoa. Arraunlari asko etorri eta joan dira, eta taldeak bere lehiakortasuna mantendu du. Egia da ere, etortzen direnak berehala sartzen direla taldearen dinamikan. Arraunlariak eta patroiak aldatuta ere, taldearentzat ikur bihurtzen direnak joanda ere, Arraunek erakutsi du aurrera egiteko duen gaitasuna.
X.U.: Nik uste dut talde honetan erreleboak modu nahiko naturalean ari garela ematen. Azken egunotan, irabazi ditugun Kontxa guztiak errepasatzen aritu naiz, eta traineruen hamalaukoak zeharo aldatu dira. Urte batetik besterako momentuez ere gogoratu nahiz, etorkizunari kezkarekin begiratzen geniolako. Azken batean, urtetik urtera aurreikusten diren aldaketekin, hurrengo sasoia desastre bat izango zela pentsatzen genuen. Ordea, egoera txarretan ere buelta ematea lortu dugu, eta modu natural batean sartu gara dinamika onean. Horri esker lortu dugu guztia, eta irabazteko gosea mantendu dugu. Orain, hurrengo denboraldiari begira jartzen naiz, eta ikusiko dugu berdin jarraitzeko aukerarik izaten dugun.
L.E.: Nik harrobitik datozenak nabarmendu nahi nituzke. Izan ere, datozenak prestatuta eta gogotsu datoz. Taldearekin dinamikarekin erraz bat egiten dute, eta seguru nago taldean leku garrantzitsua hartuko dutela.
A.B.: Horrela jarraituz gero, irabazteko gogoari eutsiko diogu. Asko gustatzen zaigu irabaztea, badakigulako zein den sentsazioa. Kirolari bat dinamika honetan sartzen denean, ez da nekatzen irabazteaz.
