Udalak datorren astean hartuko du Bretxaren gidaritza, obrak amaitu ahal izateko
Bretxako merkatuaren sarbidea.Inaxio Esnaola 
Bretxako emakidaduna izandakoak, Baika enpresak, aste honetan utziko du merkatuko lanen ardura, eta Donostiako Udaleko Sustapen Sailak hartuko du. Horrela, Bretxako Arrandegi eraikinaren inguruan egin behar diren lanak bukatu ahal izango ditu udalak.
Baikak duela urte eta erdi merkatu berriko lanak geldiarazi zituen, eta udalak, enpresaren jarreraz nekatuta, maiatzaren amaieran hiru hilabete eman zizkion instalazioak husteko. Baika epe hori geldiarazten saiatu da, baina udal gobernuak atzera bota du bere helegitea, eta udaleko iturrien arabera, epaitegiak ere Baika babestu ez duenez, obrako materiala Bretxatik eramaten hasi da enpresa.
Beraz, datorren astetik aurrera, udalak Bretxako merkatuaren agintea hartuko du, auzitegiek kudeaketa eta ustiapen kontratua haustearen legezkotasunari buruzko erabakia noiz hartuko zain. Horrela, Arrandegi eraikinaren inguruko lanak San Tomas egunerako amaitzea aurreikusten du udalak.
Horrez gain, beste hainbat lan egin beharko dituzte merkatuaren inguruan. Besteak beste, Fitness Park gimnasioak urtebete baino gehiago darama blokeatuta. Gainera, saltzaileek merkatuaren gaur egungo kokapenaren behin-behinekotasunarekin bukatu nahi dute. Horrez gain, Aldamar kalearen ondoan eraikita dagoen sarbide berria irekitzea eskatu dute, igogailua eta sotorako eskailerak dituena.
Eneko Goia alkateak duela hilabete batzuk aurreratu zuen ezin dela aurreikusi operazio osoa hemezortzi hilabete baino lehen bukatzea.
Kalte ordainak
Baika enpresari kalte ordainak ordaindu beharko dizkio udalari, Bretxako emakida kontratua 25 urte lehenago iraungitzeagatik. 6.221.444 euroko konpentsazio ekonomikoa ematea aurreikusten du udalak, eta administrazioak zenbateko hori orekatzea espero du emakidadunak udalari eragindako kalte galeren erreklamazioarekin.
