San Bartolome muinoko obrak urtea amaitu baino lehen hasiko dira
San Bartolome Hirigintza Esparruko Plan Bereziaren simulazioa. 
Donostiako Udalak astearteko Tokiko Gobernu Batzordean onartuko ditu San Bartolome eremuko merkataritza gunea eraikitzeko obra lizentzia. Enpresako iturriek hainbat hedabideri aurreratu diotenez, lanak aurtengo urtea amaitu baino lehen hasiko dira, eta hiru urte inguru iraungo dute. Hala, ustekabeko ezustekorik gertatzen ez bada, lanak 2027aren amaieran amaitu beharko lituzkete, eta merkataritza gunea 2028aren hasierarako ireki.
Hurrengo urteetan, beraz, San Bartolome muinoa barrutik hustuko dute 8.000 metro koadro eta bost solairu dituen merkataritza zentroa eraikitzeko. Denbora tarte horretan, gainera, lurpeko aparkaleku bat eraikiko dute, lau solairukoa eta 270 plazakoa. Proiektua aurrera eramango duen Midfield/New San Bartolome enpresak liburuxkak informatiboak editatzeko asmoa du, egutegiaren esku hartzeek eta obren gorabeherek gehien eragingo dituzten bizilagunentzako. Diotenez, une oro saiatuko dira eragozpenak “ahalik eta txikienak izan daitezen”.
Proiektu polemikoa
San Bartolome birsortzeko asmoa aspaldikoa da, eta betidanik izan da polemikoa, Erdialdeko bizilagun eta merkatari asko proiektuaren aurka agertu baitira. Hiru udal gobernu eta alkate desberdinek izan dute proiektua eskuartean. Odon Elorza sozialistak proposatu zuen, eta haren udal gobernuak 2005eko azaroan eman zion hasierako onarpena. Muinoa birsortzeko eremuko etxebizitza asko eraitsi eta berriak eraikitzea aurreikusi zuten. Donostiako 2011ko udal hauteskundeen ostean, EH Bilduko alkate Karlos Izagirrek topo egin zuen proiektuarekin, eta San Bartolomeko hirigintza plana “aurrera eramateko” proposamena aurkeztu zuen.
EAJk 2015ean udal hauteskundeak irabazi zituenetik, San Bartolomeko hirigintza planak eztabaida sortu du jeltzaleen eta EH Bilduren artean. EH Bilduk dio San Bartolome hirigintza planaren irizpide orokorrak zehaztu zituztela, baina Plan Berezia egungo udal gobernuak sustatu duela. Bilduren udal gobernuak eremu bat gorde zuen proiektuan hirugarren sektorearentzat, baina ez zuen zehaztu merkataritza zentro bat kokatzeko izango zen edo ez. Eneko Goia alkateak, baina, koalizio abertzalearen udal gobernuak adosturiko proiektuari jarraipena eman diotela adierazi dute egungo sustatzaile EAJk eta PSE-EEk.
