«Txirrindularitza eta ikasketak uztartzea izango da helburua»
Donostialdea Bizikletan taldearekin azken pedalkadak eman ditu Unax Beteluk (Egia, 2006). Gazte mailatik afizionatuetara pasatuko da, eta erronkari aurre egiteko gogotsu dago.
Gazte mailako bigarren eta azken urtea bukatuta, gustura emandako mailarekin?
Egia esan, nahiko gorabeheratsua izan da. Hasiera kaskarra izan zen, Eibarko lasterketan erori nintzelako. Ondorioz, kostatu zitzaidan egoerari buelta ematea. Dena dela, sasoi erdialdean nire maila emateko aukera izan nuen, eta proba askotan onenekin aritu nintzen lehian. Esaterako, ondo aritu nintzen Gipuzkoako Itzulian. Denboraldi bukaeran ere sentsazio onak izan nituen, baina zorte pixka bat falta izan zitzaidan emaitza hobeagoak lortzeko.
Martxoan hasi zinen lehiatzen, eta irailean bukatu zenuen. Hainbat lasterketetan lehen hamarren artean sailkatu zinen, eta, tartean, podiumera igo zinen Anoetako proban. Zein lorpen nabarmenduko zenituzke?
Zegaman jokaturiko Euskadiko gazte mailako txapelketa. Ihes eginda ibili nintzen, eta horri esker mendiko saria irabazi nuen. Ordea, ezin izan nuen proba borobildu. Aldapa behera atzetik zetozen batzuk aurrera egin zuten, eta beste talde batek harrapatu ninduen. Azkenik, hamaikagarren postuan bukatu nuen. Horrela ere, txapelketa polita egin nuela uste dut.
Anoetako podiumari dagokionez, txirrindulari on asko falta ziren Nafarroako Klasikoaren egun berean jokatu zelako. Emaitza on bat lortzeko asmoarekin atera nintzen, eta hirugarren sailkatu nintzen.
Txirrindulari gisa dituzun ezaugarriak kontuan hartuta, zein eremutan moldatzen zara ondoen, aldapa gora, lauan ala erlojuaren kontra?
Argi daukat igotzailea naizela. Nahiko diesela naiz, eta hobeto moldatzen naiz mendate luzeetan. Erritmo aldaketa gutxiko igoeretan ematen du maila onena. Bestalde, aldapa behera ere nahiko ondo moldatzen naiz.
Donostialdea Bizikletan txirrindularitza eskolari dagokionez, zenbaterainokoa da haiekin hazi izana ziklista gisara?
Ezinbestekoa. Haurra nintzela hasi nintzen, klubaren izena Donosti Berri zenean, eta kategoria guztietatik pasatu naiz gazte mailako bi urteak egiteraino. Guztira, zazpi urte. Familia bat bihurtu da niretzat, eta txirrindulari gisa hazteko leku onena izan da.
Beraz, garrantzitsua da eskolak aurrera egitea. Dena dela, zuzendari bila dabiltza datorren denboraldirako.
Urtero gertatzen den zerbait da. Denboraldia luze egiten da, eta ez da erraza boluntario gisa zuzendari, entrenatzaile eta prestatzaile lanak beteko dituen jendea topatzea. Normalean, taldetik pasatu diren ziklistak itzultzen dira horrelako ardurak betetzera. Esaterako, nik entrenatzaile asko izan ditut zazpi urteotan, ia berri bat urtero. Espero dut bilatzen dutena topatzea datorren sasoirako.
Gipuzkoako Txirrindularitzak manifestaziora deitu du etzirako. Dimititu zuen federazioak ez ezik, klubek eta txirrindulariek zuen haserrea adierazi duzue Gipuzkoan lasterketak egiteko era guztietako trabak jartzen dituztelako. Irtenbiderik ba ote dago?
Ez dakit. Azken urteotan askotariko arazoak jasan ditugu. Iaz denboraldi hasiera atzeratu ziguten lasterketetako segurtasuna bermatzen duten lotura motorrekin talkak zeudelako. Aurten egoerak okerrera egin du, lasterketa batzuk errepide jakinetatik pasatzea galarazi edo oztopoak jarri dituztelako. Dena dela, badirudi egoera zertxobait hobetu dela, baina ez dakit manifestazioarengatik izan den edo ez.
Manifestazioan parte hartuko duzu?
Bai, noski. Donostian izanik, hantxe izango naiz aldarrikapen eta eskaerekin bat egiteko.
Datorren sasoiari begira, txirrindularitzan jarraituko duzu?
Bai, afizionatu mailara egingo dut jauzia. Jira-Bira Eulen taldearekin ariko naiz datorren sasoian. Udan deitu ninduten, eta ados jarri ginen, gutxienez, datorren bi urtetarako. Lagun bat aritu da talde horrekin korritzen, eta ezagutzen ditut datorren denboraldian nirekin batera ariko diren beste ziklista batzuk. Gustura ibiliko naiz, seguru. Nolanahi ere, pixka bat beldur naiz ingeniaritza ikasketak hasi ditut, eta ez dakit txirrindularitzarekin uztartu ahal izango dudan. Atseden txiki bat eginda, entrenamenduetara itzuliko naiz, eta orduan ikusiko dut ikasketak eta kirola bateragarriak ote diren.
Gazte mailan txukun samar aritu ondoren, afizionatu mailara emango duzu jauzia. Esan ohi da bien arteko aldea nabaritzen dela. Halere, Euskal Herriko egutegia nahiko menditsua da, eta hori aproposa izan daiteke zuretzat, ezta?
Bai, horrek asko motibatzen nau. Kategoriaz pasatu ahala, nire ezaugarrientzat aproposagoak diren lasterketak jokatzen dira Euskal Herrian. Igotzailea naiz, eta badakit niretzat egokiak diren mendateak igoko ditugula afizionatuetan.
Zein helburu jarri diozu zeure buruari?
Lehen urtea ikasteko aprobetxatuko dut, presiorik gabe. Txirrindularitza eta ikasketak uztartzea izango da helburua, eta, ahal dudan neurrian, taldeari laguntzea.
Azken urteotan joera bihurtu da gazte mailako ziklistek zuzenean pausoa ematea talde profesionaletara. Zer iritzi duzu horren inguruan?
Gure artean aipatu ohi dugu. Aurten, nirekin batera lehian aritu diren tropeleko hainbat gaztek sinatu dute kontratua World Tour mailako filialekin. Adibidez, Hodei Muñoz eta Marco Martin aipatu ditzaket. Nire ustez, batzuek goizegi egin nahi dute profesionaletarako urratsa, eta uste dut komeni dela afizionatu mailatik pasatzea. •